زێدەتری 22 هزار كەسان فۆرمێن یەكەیێن كرێداران پێشكێش كرینە
هەولێر، قائید میرۆ:
وەزارەتا ئاڤاكرن و ئاكنجیكرنێ یا حوكمەتا هەرێما كوردستانێ دیار كر، ژڤانێ پێشكێشكرنا فۆرمێن یەكەیێن كرێداران ناهێتە درێژكرن و بەرپرسەكێ وەزارەتێ ژی دبێژیت: زێدەتری 22 هزار كەسان فۆرمێن یەكەیێن كرێداران پێشكێش كرینە و یێن دی ژی نەگەهشتینە چو ئەنجامان و ناڤێن وان تۆمار نەبووینە.
مەریوان مەلا حەسەن، پەیڤدارێ وەزارەتا ئاڤاكرنێ بۆ رۆژناما ئەڤرۆ خویا كر، دەمێ پڕكرنا فۆرمێن یەكەیێن كرێداران ب دوماهی هاتیە و د دەمێ نوكە دا لینكێ پڕكرنا فۆرمێن كرێداران ناهێتە ڤەكرن و گۆت: «وەزارەتا ئاڤاكرنێ ژی بڕیار دایە جارەكا دی دەم ناهێتە درێژكرن، ژ بەركو بەری نها دو جاران ژڤانێ پێشكێشكرنا فۆرمێن كرێداران هاتیە درێژكرن، ئەو كەسێن زانیاریێن دروست پێشكێش نەكرین دێ ژ لایێ رێڤەبەریێن تاپۆیێ ڤە ناڤێن وان هێنە ڤاڤارتن، هەتا كەسێن هەژار ژ وەرگرتنا یەكەیێن ئاكنجیبوونێ مفادار بن».
مەریوان مەلا حەسەن گۆتژی: «هەژمارەكا زۆرا وەلاتیان سەرەدانا لینكێ پێشكێشكرنا فۆرمێن كرێداران كریە، بەلێ دەمێ مەرج تێدا نەبووینە دەست ژێ بەردایە، لەوڕا ب تنێ 22 هزار و 50 كەسان ب تەمامی فۆرم پێشكێش كرینە و قووناغا دویێ ژی دێ ئەنجامدانا تیرۆپشكێ بیت بۆ وەرگرتنا یەكەیێن ئاكنجیبوونێ، هەتا شوقە دهێنە تەمامكرن و د دووڤ دا ل سەر كەسێن ناڤێن وان دەرچووی بهێنە بەلاڤكرن».
