وەزارەتا كارەبێ: بەردەوام بزاڤان بۆ زێدەكرنا بەرهەمئینانا كارەبێ دكەین
هەولێر، قائید میرۆ:
پەیڤدارێ وەزارەتا كارەبێ ئاشكرا كر، ژ بەر بلندبوونا پلەیێن سەرمایێ د دەمێ نوكە دا خواست ل سەر بكارئینانا كارەبا نیشتمانی زێدەبوویە، ئەڤە ژی بوویە ئەگەر دەمژمێرێن دانا كارەبێ بۆ وەلاتیان كێم ببن و دبێژیت: د دەمێ نوكە دا ب تنێ حەفت هەتا هەشت دەمژمێران كارەبێ ددەینە وەلاتیان.
ئومێد ئەحمەد، پەیڤدارێ وەزارەتا كارەبێ بۆ رۆژناما ئەڤرۆ دیار كر، د نوكە دا وەزارەتا كارەبێ سێ هزار و 500 هەتا چار هزار و 500 مێگاواتێن كارەبێ بەرهەم دئینیت و گۆت: «ژ بەر بلندبوونا پلەیێن سەرمایێ و داكەتنا پلەیێن گەرمێ خواست ل سەر كارەبا نیشتمانی ژ لایێ وەلاتیانڤە زێدەبوویە، ئەڤێ ژی كاریگەری كریە سەر كێمبوونا دانا دەمژمێرێن كارەبێ بۆ وەلاتیان، لەوڕا ژی نوكە ب تنێ وەزارەت دشێت حەفت هەتا هەشت دەمژمێرێن كارەبێ بدەتە وەلاتیان».
ئومێد ئەحمەد گۆتژی: «حوكمەتا هەرێما كوردستانێ بەردەوام كار ل سەر زێدەكرنا بەرهەمێ كارەبێ دكەت و چەندین پڕۆژە هەنە بۆ زێدەكرنا بەرهەمێ كارەبێ ل هەرێما كوردستانێ، بەلێ بجهئینانا پڕۆژێن كارەبێ چەند سالەك پێدڤینە و هەموو بزاڤەك دهێتە كرن رێژا بەرهەمئینانا كارەبێ بهێتە زێدەكرن، هەتا بشێین دەمژمێرێن كارەبێ زێدە بكەین».
