ب گوژمێ 200 ملیۆن دیناران ئاڤاهیێ بەنكا شێلادزێ هاتە نووژەنكرن
ئامێدیێ، مەحمد نهێلی:
كار د نووژەكرنا بانكا شێلادزێ دا ب داوی هات و د رێورەسمەكی دا و ب بەرهەڤبوونا دەڤەردارێ ئامێدیێ و هەژمارەكا رێڤەبەرێن فەرمانگەهێن میری و رێڤەبەرێن ناوچەداریێن دێرەلۆك و شێلادزێ هاتە ڤەكرن.
وارشین سەلمان، دەڤەردارێ ئامێدیێ دەست خوەشی ل رێڤەبەرێ بەنكا شێلادزێ كر و پاشی گەڕیانەك د ناڤا بەنكا ناڤبری دا كر ژ پێخەمەت نێزیك هایداربوون ل سەر چاوانیا ب رێڤەچوونا كارێ وان.
دەڤەردارێ ئامێدیێ بو رۆژناما ئەڤرۆ دیار كر، ژ بەر كو ئاڤاهیێ بانكا شێلادزێ بەری چەندین سالانبوو هاتیە چێكرن و شێواز و دیزاینا وێ یا كەڤن بوویە، پێدڤی ب نووژەنكرنێ بوو و گۆت: «ژ بەر وێ یەكێ ژی بەری چەند مەهەكان دەست ب نووژەنكرنا ئاڤاهیێ بانكا شێلادزێ هاتە كرن و گوژمێ 200 ملیۆن دیناران بۆ هاتبوونە تەرخانكرن، پشتی كار د نووژەنكرنێ دا تمام بووی، د رێورەسمەكی دا هاتە ڤەكرن و دێ كەڤیتە د خزمەتا خەلكێ دەڤەرێ دا».
