گەنجەكێ دهۆكێ كار بۆ ڤەژاندنا كەلتوور و كەل و پەلێن گەلەری دكەت
هەرهین محەمەد:
گەنجەكێ دهۆكێ كارێ كرین و فروتنا كەل و پەلێن كەڤن و گەلەری دكەت و دبێژیت: من دەست ب ڤی كاری كر، ژبەركو گەلەك حەز ژ ڤان تشتان دكەم و هەكە ئەڤ كەلوپەلە نە هێنە فرۆتن ژی بۆ من نەخەمە و ئەز فرۆشیارەكێ گەروكم و هەر جار ل جهەكی دفرۆشم و خوسارەتی د كارێ من دانینە.
نەزیر جانگیرحەمید، گەنجەكێ باژێرێ دهۆكێ یە كارێ كرین و فرۆتنا كەل و پەلێن كەڤن و نوی دكەت د دیدارەكێ دا بۆ رۆژنامەیا ئەڤرۆ گۆت: ئەڤە بۆ دەمەكە ئەز ڤی كاری دكەم و ئەو هزرە بۆ من چێبوو كو هەتا نوكە چ گەنجان ئەڤ كارە نەكریە و من ب خوە ژی حەزا ڤی كاری هەبوو، وەكو گوسك و دەنێن ئاڤێ و گولدانكێن گولا و گلاسئاخێ و سۆپێن مودێلا بەرێ و گەلەك حەز ژێ دكەم و حەزناكەم نەمینن ئەڤ تشتە و حەز دكەم هەرهەبن، ژبەر ڤێ چەندێ هەر یێن دگەل من و هەكە خو نەهێنە فرۆتن ژی بۆ من نە خەمە، هندی تشتەكێ كەڤن هەبیت و ئەز ببینم دێ ئینم ل دەوروبەرێن دهۆكێ و ئەڤ گوسك و گلاس و دەنێن ئاخێ پتریا وان ژ وەلاتێ ئیرانێ دهێن و هەر كەل و پەلەكی ژی بهایێ خوە یێ هەی، بەلێ نە ب ئەوی بهاینە كو ژ خەلكی نەهێت بكرن و گەلەك د ئەرزانن.
ناڤهاتی ئەو چەندە ژی گۆت: بەری نوكە من كرێكاری دكر و ئەو كارە ژی گەلەك یێ ب زەحمەتە و مرۆڤ نەشێت هەتا هەتایێ وی كاری بكەت، چونكو مرۆڤ هەموو دەمان ل سەر هێزا خوە نابیت، لەورا من بەرێ خوە دا ڤی كاری و هەر چو نە بیت كارەكێ پاقژە و داهاتەكێ كێم ژی بۆ من بهێت.
زێدەتر ژی گۆت: ئەڤ كەل و پەلێن ئەز دفرۆشم من چ جهێن تایبەت نینن كو لێ بفرۆشم هەر جار ل جهەكی مە، ئانكو فرۆشیارەكێ گەروكم و كەل و پەلێن خوە د پشتا تورمبێلا خوە دا نمایش دكەم و باژێرڤانی ژی رێگر نینە و دهاریكارن، بەلێ د سەر هندێ را كار نینە و خەلكی پارە نین و كرینا ڤان تشتان نە تشتەكێ پێدڤیە بۆ مرۆڤی و هەكە ئێك بكریت ژی بۆ خۆشی دكریت و خەلكێ مە ژی گەلەك حەز ژ تشتێن فلكلۆری و گەلەری دكەن و هەكە ب كارنەئینن ژی ژ بۆ جوانیێ دانن.
