وەكو بەرهەڤی بۆ نەورۆزا ئاكرێ گۆڕستانا سەرێ گری هاتە ڤەگوهاستن
ئاكرێ، صەباح و رەمەزان:
بلند رزا زێباری، سەرۆكێ باژێرڤانیا ئاكرێ دیار كر، ب مەرەما كارئاسانی بۆ هاتنوچوونا شۆفێران و خوە بەرهەڤكرن بۆ جەژنا نەورۆزێ، ل سەر بودجەیا باژێرڤانیا ئاكرێ دەست ب بەرفرەهكرنا جاددەیا سەرێ بیۆكێ و جاددەیا سەرێ گری و باژێرێ كەڤنارێ ئاكرێ هاتە كرن.
ناڤهاتی بۆ رۆژناما ئەڤرۆ گۆت: «ل دووڤ رازیبوونا مالباتێن وان گوڕێن د ناڤ گورستانا سەرێ گرێ ئاكرێ بۆ گورستانا ئاكرێ و بەرۆكا سەیدایی ل گورەیی قانونێ و رێنمایێن ئەوقافێ هاتنە ڤەگوهاستن».
سەرۆكێ باژێرڤانیا ئاكرێ زێدەتر گۆت: «ئەم ب رێكا دەڤەرداریا ئاكرێ ل گەل پارێزگەها دهۆكێ د پەیوەندیان داینە بۆ دابینكرنا بودجەیەكا تایبەت بۆ بەرفرەهكرنا مەیدانا سەرێ گری، كو نوكە كار ل سەر دهێتە كرن ب درێژاهیا هزار مێتران سەرێ گری دهێتە بەرفرەهكرن ب مەرەما زێدەتر خزمەتكرنا گەشتیاران ل رۆژێن جەژنا نەورۆزێ«.
