توركیا ئامیرەكێ شكاندنا بەران دانایە پشتا گوندێ كێستە
ئەڤە مەهەكە توركیا ئامیرەیێن شكاندن و هووركرنا بەران ئیناینە پشتا گوندێ كێستە ل دەڤەرا بەرواری بالا و ئەو بەرێن ئەو دشكێنن بۆ چێكرنا وان رێیان بكاردئینن یێن كو نوو بۆ خالێن خوە ل دەڤەرێ ب كاردئینن یان ژی وان بەران دبەنە ئالیێ دی یێ سنووری ل توركیا.
وەلاتیەكێ گوندێ كێستە، بۆ رۆژناما ئەڤرۆ دیا كر، ئەڤە مەهەكە توركیا ئامیرەیێن شكاندن و هووركرنا بەران ئیناینە بەستا فەقالی، كو ئەو جهە نێزیكی كانیا گویزانە ل پشتا گوندێ كێستە ل دەڤەرا بەرواری بالا، ئەو وان بەران دشكێنن و بۆ وان رێیان ب كاردئینن یێن نوو چێدكەن، یان ژی دبەنە ئالییێ دی یێ توركییا.
وی وەلاتیێ گوندێ كێستە گۆت: «پشتی وان ئالۆزییێن بەری نوكە پەیدا بووین، توركیا چەندین جهـ ل دەڤەرا بەرواری بالا گرتین و ل وان جهان بنەجهـ بووین و رێك ژ ئالیێ باكوورێ كوردستانێڤە ئیناینە وان گوندان و ل دەستپێكێ دەست ب بڕینا داران كری و نوكە یێ بەران دبەن، هەروەسا نوكە ئەم وەكو خەلكێ گوندێ كێستە نەشێین بچینە وان جهان و ژ گوندی دوور بكەڤین».
