کچەک: ل کافێتریایێ تووشی دەستدرێژیێ بووم
کچەکا ٢٢ سالی بۆ رۆژناما ئەڤرۆ دیار کر کو پشتی بارێ وان یێ ئابوری لاواز بوی ئەوێ ڤیا کارەکی بکەت داکو هاریکاریا خێزانا خۆ بکەت و گۆت: بەلێ پشتی تووشی دەستدرێژیێ بویم من کارێ خو هێلا، ژبەرکو کەرامەتا من ژ هەر تشتی گرنگترە.
ئەڤرۆ، دلشاد عەبدوللا:
(ش.ج) ئەو کچەیە گۆت: (من سیڤیێ خو پێشکێشی چەندین جهان کر، داکو کار بکەم، پشتی ماوەیەکێ ئەز ل کــــافـتریەکێ هاتمە وەرگرتن، دەما من ل وێرە کار دکر کومەکا گەنجان جار جار دهاتنە کافتریایێ و من ژی خزمەتا وان دکر).
ڤێ کچێ زێدەتر گۆت: (بەلێ روژەکێ ئێک ژ وان گەنجان داخواز ژ من کر ئەس هندەک تشتێن خوارنێ دانمە سەر مێزا وان، دەمێ من کارێ رێکخستنا مێزێ کری ئەس تووشی ئاخفتێن نەشرین و دەست درێژیێ و هەڤروشیا لەشی بوم، ئەز گەلەک تورە بوم و دەروونێ من تێکچو من ئەو کورە گەلەک رەزیل کر و ب ئێک جاری من کارێ خو هێلا).
سەبارەت پرسیارا مە کا بۆچی سکالا تومار نەدکر؟ ڤێ کچا ٢٢ سالی گوت: (د ڤی سەردەمی دا خەلکێ مە ب گوها دبینیت نەک ب چاڤا، لەورا من نەڤیا سکالایێ بکەم، ژبەرکو ئەس دا تووشی هندەک ئاریشێن دی بم ژلایێ خێزانێ و دەوروبەراڤە و دا پتر هێمە ئێشاندن).
چارەسەری
خوشکا هێژا: مخابن د ڤی سەردەمیدا هندەک کەسێن ناخ پیس هەنە دبنە ئەگەر کو ئافرەت دەستا ژ کارێ خو بەردەت، سەرەرای کو د پێدڤینە و حەز دکەن کار بکەن داکو هاریکاریا خێزانا خۆ بکەن، کەرامەت ژ هەر تشتەکی گرنگترە و خودێ مافێ کەسێ بەرزە ناکەت دەرگەهەکی دگریت وئێکێ باشتر ب دلوڤانیا خو ڤەدکەتن، یا دیارە تو کەسەکا خودان رێزی، ژبەرکو ژبەر کاودانێن خراب و بارێ لاواز یێ خێزانا تە و ژ نەچاری تە ئەڤ کارە کریە، بەلێ باشترە تو دەستا نە داهێلی و سەح کەیە کارەکێ دی.
راستە د جڤاکی دا مافێ پتریا کەسان دهێتە خوارن و نەشێن پەنایی ببنە بەر دادگەهێ ژ شەرم و ترسا خێزانێ و جڤاکی، مخابن پتریا قوربانێن ئەڤێ جورە تاوانێ د بێدەنگن، ژبەرکو د ترسن تووشی هەتکبەریێ ببن، بەلێ نوکە ل دادگەهێن هەرێمێ هەر کەسێ تووشی ڤان جورە ئاریشان دبیت، کەیسا وان ب رێزڤە دهێتە ب رێڤە برن بێ کو ناڤێ وان بهێتە ئاشکرا کرن و ب نهێنی دهێتە ب دووماهیک ئینان.
د ماددێن 400.401.402 دا هاتیە ئەو کەسێ دەست درێژیێ ل سەر ئافرەتێ بکەت، چ یا لەشی بیت یان ژی ئاخفتن و دەستکرن بیت و کەرامەتا وێ بشکێنیت، دێ هێتە سزا دان ب سێ هەیڤێن زیندان کرنێ ب و غرامە کرن ژ دوسەد هزارا حەتا ئێک ملیون دینارا.
