مافێ چاره‌نڤیس د گوپیتكا جیهانى یا حوكمه‌تان دا

سه‌لام بالایى
مسرۆر بارزانی سه‌رۆكێ حوكمه‌تا هه‌رێما كوردستانێ پشكدارى د گوپیتكا جیهانى یا حوكماتان دا كر، ل دویڤ داخوازنامه‌یه‌كا تایبه‌ت یا شێخ محه‌مه‌د بن راشد ئال مه‌كتۆم؛ جێگرێ سه‌ر ۆكێ ده‌وله‌تا ئیماراتێ و سه‌رۆكێ جڤاتا وه‌زیرێن ئیماراتَى و حاكمێ دوبه‌ى.
ئه‌ڤ داخوازنامه‌ و ئه‌ڤ پشكدارییه‌ ئێك ژ فاكته‌ رێن هه‌ره‌ گرنگن ل سه‌ر ئاستێ جیهانى و ئه‌ره‌بى و هه‌رێمایه‌تى، ئه‌ڤه‌ ب خوه‌ دانپێدانه‌كا فه‌رمییه‌ ژبۆ قه‌واره‌یێ هه‌رێما كوردسانێ و حوكمه‌تا وێ ب هه‌مى سازیێن خوه‌ڤه‌. چونكو هژماره‌ك وه‌زیرێن هه‌رێما كوردستانێ ل گه‌ل سه‌رۆكێ حوكمه‌تێ دپشكدارن.
دخوازم د ڤێ گوتارێ دا ئاماژێ ب چه‌ند خالێن گرنگ بكه‌م یێن ڤێ گوپیتكێ.
ئێك: پێشكێشكرنا گوتارا سه‌رۆكێ حوكمه‌تا كوردستانێ مل ب ملێ سه‌رۆكێن چه‌ندین ده‌وله‌تێن زلهێز و خودان بڕیار ڤه‌ ل جیهانێ گرنگییه‌ك ئێكجار زۆر هه‌یه‌، ب تایبه‌ت ئه‌گه‌ر ئه‌م به‌حسا ناڤه‌رۆكا گوتارا مسرۆر بارزانی بكه‌ین، یاكو چه‌ندین خالێن گرنگ د گوتارا خوه‌دا دانه‌ دیاركرن كو نه‌تنێ گرێدایى هه‌رێما كوردستانێ و ئیراقێ بوون، به‌لكى مرۆڤ دكاریت بێژی گوتاره‌ك جیهانى بوو ب پڕانیا خالێن خوه‌ڤه‌. یا گرنگ د ڤیى گوتارێ دا ب وێره‌كانه‌ به‌رامبه‌ر ته‌ڤ جیهانێ ئاماژه‌ ب مافێ چاره‌نڤیسیى خه‌لكێ كوردستانێ كرى و گۆتى: مه‌ژی دڤێت وه‌ك هه‌ر گه‌له‌كێ خودان ماف و ئازادى بین.
گه‌لێ كورد ب ریفراندۆمێ و خوازیارا خوه‌ بڕیارا خوه‌ ل ٢٠١٧دایه‌، گرنگه‌ جڤاكیى ده‌ولى و هه‌رێمى پشته‌ڤان بن ژبۆ ئازادى و دیمۆكراتیێ ل كوردستانێ.
دو: داخوازكرنا مسرۆر بارزانی د ڤێ گوپیتكێ دا وه‌رار و ئاڕامى و پێكڤه‌ژیانا ئۆلى و نه‌ته‌وه‌ى یاكو ل هه‌رێما كوردستانێ ره‌نگڤه‌دایه‌ ل ته‌ڤایا ناڤه‌ندێن خوه‌دی بڕیار.
یا سَیێ: كۆمبوونێن سه‌رۆكێ حوكمه‌تا كوردستانێ دگه‌ل سه‌رۆك و وه‌زیرێن جیهانێ و ده‌وله‌تێ ئه‌ره‌بى و هه‌رێمى خالا هه‌ره‌ گرنگه‌ ژبۆ هه‌رێما كوردستانێ و هاتنا سه‌رمایه‌دار و كۆمپانیێن بیانی ژبۆ گه‌شه‌كرنا ئابۆرى یا هه‌رێما كوردستانێ یه‌.
په‌یوه‌ندیێن دوبه‌ى و هه‌ولێرێ نیشانا ئاڤه‌دانى و ئارامیا كوردستانێ یه‌.
دوهی داڤۆس و ئه‌ڤرۆ گوپیتكا حوكمه‌تان، ئاماژه‌یێن هه‌ره‌ ب هیڤینه‌ ژبۆ گه‌لێ كورد و د ئاینده‌ك نێزیك دا مافێ چاره‌نڤیس و بلندكرنا ئالایێ كوردستانێ ل ته‌ڤ مه‌حفه‌لێن جیهانى.
بلا ته‌ڤ لایه‌ن و ته‌ڤ خودی بڕیار ب ئێك ئارمانج و ئێك گوتار به‌ره‌ڤانیێ ژ ڤێ ئاخێ و ڤێ ناسنامێ بكه‌ن داكو رۆژ ب رۆژ كوردستانا مه‌ گه‌شێ بكه‌ت و ملله‌تێ مه‌ ژ كاره‌سات و قه‌یرانان رزگار ببیت.
هه‌ر ئاڤه‌دان بیت كوردستان.

کۆمێنتا تە