هەتا نۆكە 40 هزار فەرمانبەران كارتێن بانكی وەرگرتینە
سولین سلێمان:
پرۆژێ “هەژمارا من” ئێكە ژ دەستكەفتێن ستراتیژیێن كابینا نەها حوكمەتا هەرێما كوردستانێ و تایبەتە ب ئەلكترۆنیكرنا موچەیێن فەرمانبەرێن حوكمەتا هەرێما كوردستانێ ڤە، بەرپرسێ ڤی پرۆژەی دبێژیت: هەتا نۆكە 203 هزار فەرمانبەر تێدا هاتینە تۆرمار كرن و ئەڤ پرۆژە تا دووماهیا ئەڤ ساڵە دێ تمام بیت، هەتا هەموو فەرمانبەر موچەیێن خۆ ب شێوێ ئەلكترۆنی وەرگرن كۆ هەژمارا وان ئێك ملیون كەسن.
مەروان ئازۆز ئەحمەد سەرپەرشتیاری پرۆژا “ هەژمارا من “ ل نڤیسینگەها سەرۆك وەزیرێن حوكمەتا هەرێما كوردستانێ بۆ رۆژناما ئەڤرۆ گۆت ”ل ئەیلولا سالا بۆری یا 2023 مە دەست ب ڤەكرنا هژمارا بانكی ل پارێزگەها هەولێری كر و د نوكە د قوناغێن دووماهیكێ دایە ل وێ پاریزگەهێ، تێدا نێزیكی 203 هزار فەرمانبەر هاتینە تۆمار كرن و گۆت: مە دەست ب رادەستكرنا كارتێن وان فەرمانبەران كرینە و تێدا 40 هزار فەرمانبەران كارتێن خۆ وەرگرتینە.
مەروان ئازۆر گۆتژی” ل مەها بوریدا مە دەست ب پارەدانكرنا وان فەرمانبەران كرینە ئەوێن ناڤێن وان د پرۆژەی دا هەین و تێدا سێ هزار فەرمانبەران موچەیێن خۆ ب شێوازێ ئەلكترۆنی وەرگرتینە، د هەمان دەم دا د ڤێ مەهێ ژی دا ب هەمان شێواز دێ موچێن خۆ ب ئەلكترۆنی وەرگرن.
ئاشكرا ژی كر “ل مەها 11 ژ سالا بوری، سەرۆكێ حوكمەتا هەرێما كوردستانێ داخاز كر وان رێكاران ل هەر ئێك پارێزگەها دهۆك و سلێمانیێ ژی بهێنە ئەنجام دان، ل وی دەمی دەست ب كاركریە ب هەمان شێواز هەژمارا بانكی ژ بۆ فەرمانبەرێن وان دو پارێزگەهان ژی بهێنە ڤەكرن،.
گوت ژی: د نۆكەدا (ئەی تی ئێم) ژ بۆ پارێزگەها هەولێرێ دهێنە دانان، وان ئەی تی ئێما بانك تێدا دهێنە دانان و هەتا نۆكە نێزیكی 11 ئەی تی ئێم هاتینە دانان، د دەمەكێ نێزیك دا ئەو ئەی تی ئێمە هەژمار وان ژ بۆ 250یان دێ بلند بیت.
ژ لایەكێ دووڤە گۆت ”ئەڤ ئەی تی ئێم ستێنشە ژ بۆ هەردو پارێزگەهێن دهۆك و سلێمانیێ ژی دێ هێنە دانان و ل دۆر پلانا مە ئەڤ پرۆژە تا دووماهیا ئەڤ ساڵە دێ تمام بیت، هەتا هەموو فەرمانبەر موچەیێن خۆ ب شێوازێ ئەلكترۆنی وەرگرن كۆ هەژمارا وان ئێك ملیون كەسن.
