71 سالیا دامەزراندنا ئێكەتیا قوتابی و لاوان ب چەندین چالاكیێن جودا هاتە ساخكرن
ئاكرێ، رەمەزان زەكەریا:
هەلكەفتا 18ی شواتێ 71 سالیا دامەزراندنا هەردو رێكخراوێن ئێكەتیا قوتابیێن كوردستانێ و ئێكەتیا لاوێن دیموكراتا كوردستانێ ل سەرانسەری پارێزگەها دهۆكێ ب چەندین چالاكیێن جودا و ب بەرهەڤبوونا بەرپرسێن حزبی و حكومی هاتە ساخكرن.
ب بەرهەڤبوونا سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ و دكتۆر عەلی تەتەر، پارێزگارێ دهۆكێ و هەردو دەڤەردارێن ئاكرێ و بەردەڕەش و هەژمارەكا فەرماندە و كەسایەتیێن دەڤەێ و جەماوەرەكێ زۆر، دوهی 18/2/2024 ل دەڤەرداریا ئاكرێ رێورەسمێن ساخكرنا 71 سالیا دامەزراندنا ئێكەتیا قوتابیێن كوردستانێ و ئێكەتیا لاوێن دیموكراتا كوردستانێ ب چەندین چالاكیان هاتە ساخكرن.
شاندێ مەكتەبا رێكخستنا پارتی ل پارێزگەها دهۆكێ و پارێزگارێ دهۆكێ ب جۆدا سەردانا رێكخراوا ئێكەتیا لاوان و قوتابیان كر و پەیامێن پیرۆزباهیێ گەهاندنە بەرپرس و كارگێرێن هەردو رێكخراوان و پەسنا كارێن وان كر ل دەمێ بۆری و هیڤیا پێشەڤەچوون و سەركەفتنێن زێدەتر بۆ خواست.
رێكخراوێن ئێكەتیا لاوێن دیموكراتا كوردستانێ و ئێكەتیا قوتابیێن كوردستانێ ل 18/2/1953 ل سەر دەستێ مەلا مستەفا بارزانی هاتنە دامەزراندن.
دیسا هەر ب هەمان هەلكەفتا دامەزراندنا ئێكەتیا قوتابیێن كوردستانێ و ئێكەتیا لاوێن دیموكراتا كوردستانێ ل سنوورێ دەڤەرداریا ئامێدیێ و لقێ 18 یێ پارتی و لقێ قوتابیان، چەندین چالاكیێن جودا هاتنە ئەنجامدان و ئەڤ رۆژە هاتە پیرۆزكرن.
دیسا هەر ب هەلكەفتا دامەزراندنا ئێكەتیا قوتابیێن كوردستانێ و ئێكەتیا لاوێن دیموكراتا كوردستانێ دوهی 18/2/2024 ل هۆلا گەردۆن، هەردو رێكخراوێن قوتابی و لاوان پێشوازی ل مێهڤانان كرن.
