هەتا نوكە وەبەرهێنەرێن بیانی 46 پرۆژەیێن گرنگ ل هەرێما كوردستانێ ئەنجامداینە
ئەمیر ئەترووشی:
پەیڤدارێ دەستەیا وەبەرهێنانێ ل هەرێما كوردستانێ راگەهاند، ل سەر راسپاردا مەسرور بارزانی” سەرۆكێ حوكمەتا هەرێما كوردستانێ” كار دهێتە كرن بۆ هندێ وەبەرهێنەرێن بیانی بهێنە هەرێما كوردستانێ، نوكە بەردەوام وەبەرهێنەرێن بیانی دهێنە هەرێما كوردستانێ و پروپۆزەلان بۆ چێكرنا پڕۆژان پێشكێش دكەن، ئەم ژی هەموو ئاسانكارییان بۆ دكەین بۆ ئەنجامدانا پڕۆژێن نوو، نوكە قەبارێ وەبەرهێنانا بیانی ل هەرێمێ گەهشتیە پتری 10 ملیار دۆلاران و وان پرۆژان ب هزاران دەلیڤێن كاری ل هەرێما كوردستانێ بۆ خەلكێ پەیدا كرینە.
بەرگەشت ئاكرەیی، پەیڤدارێ دەستەیا وەبەرهێنانێ ل هەرێما كوردستانێ زێدەتر گۆت: قەبارێ وەبەرهێنانا هەرێما كوردستانێ ل گەل وەلاتێن بیانی، ب تایبەتی وەلاتێن وەكو قەتەر، سعوودیە و ئیماراتێ د ئاستەكێ بلند دایە” ب رەنگەكێ گشتی قەبارێ وەبەرهێنانا هەرێما كوردستانێ ژ سالا 2006 ێ هەتا نوكە ل گەل وەلاتێن بیانی دگەهیتە 10 ملیار و 65 ملیۆن و 539 هزار و 979 دۆلاران و هەموو سەكتەرێن وەبەرهێنانێ ڤەدگرن، وەبەرهێنانا هەڤپشك ژی دگەهیتە ملیارەك و 500 ملیۆن دۆلاران.
ناڤهاتی گۆت ژی: هژمارەكا وەلاتێن بیانی ل هەرێما كوردستانێ وەبەرهێنانێ دكەن، ژ وان ژی” مسر، بریتانیا، فرەنسا، لبنان، سوید، رووسییا، توركیا و نیوزلەندا و چین و جۆرجیا و ئیمارات و ئیران و ئەمریكا و قەتەر و چەندین وەلاتێن دیتر” هەتا نوكە وان وەلاتان 46 پرۆژێن وەبەرهێنانێ ل هەرێما كوردستانێ ئەنجامداینە.
د. هەڤال سەدیق، رێڤەبەرێ گشتیێ وەبەرهێنانێ ل پارێزگەها دهۆكێ بۆ ئەڤرۆ دیار كر، كارگەها (تیان) یا دروستكرنا ئاری دا و ۆ بەرهەمئینانا ئاری ئێك ژ مەزنترین كارگەهێن دروستكرنا ئاریە ل دهۆكێ و هەرێما كوردستانێ كو د شیان دایە د ئێك رۆژ دا پتر ژ (200) تەنێن ئاری بەرهەم بینیت و رەوانە بكەت. ئەڤ پرۆژە ب رێژا 100% ب دووماهی هاتیە و كەڤتیە د خزمەتا جوتیاران دا، سەرمایێ پروژەی نەهـ ملیون دولارن.
