ل مەها دەهـ یا ئەڤ سالە قووناغا دویێ یا كۆڕنیشێ زاخۆ دێ ب دووماهی هێت
زاخۆ، عەلی حاجی:
رێڤەبەرێ گشتی یێ گەشتوگوزارێ ل زاخۆ دیار كر، ئەو چاڤەرێ دكەن هاتنا گەشتیاران بۆ زاخۆ دوجاركی زێدەتر لێ بهێت و ڤەژاندنا كەرتێ گەشتیاری بەردەوامە.
چیا ئەمین، رێڤەبەرێ گشتی یێ گەشتوگوزارێ ل زاخۆ گۆت: «ل سالا بۆری ٥٥٠ هزار گەشتیاران قەستا باژێرێ زاخۆ كربوو، بەلێ بۆ ئەڤ سالە دێ ئەو هەژمارە دوجاركی لێهێت و دێ رێژەیا گەشتیاران گەهیتە ملیۆن گەشتیاران ل ئیدارەیا سەربخوە یا زاخۆ، دروستكرنا پڕۆژەیێن گەشتیاری و كەلتۆری ل زاخۆ بەردەوامن و د نوكە دا كار ل سەر قووناغا دویێ یا كۆڕنیشێ زاخۆ دهێتە كرن، هەتا نوكە قووناغێن باش دەرباز كرینە و دهێتە چاڤەرێكرن ئەو پڕۆژەیە ل مەها ١٠ یا ئەڤ سالە ب دووماهی بهێت و بكەڤیتە د خزمەتا وەلاتی و گەشتیاران دا، ب دروستكرنا پڕۆژەیێن گەشتیاری بێگومان دێ هاتنە گەشتیاران بەرەڤ زێدەبوونێ ڤە چیت، ئەو پڕۆژەیێن گەشتیاری، یێن ل زاخۆ هاتینە دروستكرن، كارتێكرنەكا ئەرێنی ل سەر هاتنا گەشتیاران بۆ زاخۆ هەبوو، پڕۆژەیێن دیتر ژی د ڕێ دانە ژ بۆ ئیدارەیا سەربخوە یا زاخۆ».
ناڤبری گۆتژی: «هەر ل گەل قووناغا دویێ یا كۆڕنیشێ زاخۆ، نوكە كار ل سەر دەوروبەرێن قشلا زاخۆ ل گەل بازارێ كەڤنێ زاخۆ دهێتە كرن، ئەو ئاڤاهیێ دەوروبەرێن قشلێ هەتا بەر لێڤا خابیرێ زاخۆ دهێنە ڕاكرن، داكو دەوروبەرێن قشلا زاخۆ ببنە پارك و خەلك دەمێن خوەش لێ ببۆرینن».
چیا ئەمین ل دووماهیێ گۆت: «د ناڤ بازارێ زاخۆ دا ئاڤا خابیری دبیتە دو پشك و ل پشكەكێ پشكەكا مالا دكەڤیتە بەر كۆڕنیشێ زاخۆ، لەوما مە ل گەل خودانێن وان مالان ئاخڤتیە و ئەو مالە ژی دێ هێنە ڕاكرن و هێنە قەرەبوو كرن ژی، ب دووماهی هاتنا وی پڕۆژەیی دێ زاخۆ بەرەڤ قووناغەكا دیتر چیت».
