پڕۆژەیێن وەبەرهێنانێ دێ هێنە تاپۆكرن
هەولێر، قائید میرۆ:
سەرۆكێ دەستەیا گشتیا وەبەرهێنانێ ل هەرێما كوردستانێ دیار كر، ب بڕیارا حوكمەتا هەرێما كوردستانێ پڕۆژەیێن وەبەرهێنانێ دێ هێنە تاپۆكرن و ئەڤ سالە دێ مۆلەتێ دەنە زێدەتری 200 پڕۆژەیێن نوو یێن وەبەرهێنانێ، بەلێ دێ پتریا مۆهلەتان بۆ پڕۆژەیێن كەرتێن پیشەسازی و چاندن و گەشتوگوزارێ بن.
دكتۆر محەمەد شوكری، سەرۆكێ دەستەیا وەبەرهێنانێ بۆ رۆژناما ئەڤرۆ خویا كر، ل گورەی قانوونا وەبەرهێنانێ ئەو پڕۆژەیێن مافێ تاپۆكرنێ هەی، دێ هێنە تاپۆكرن و گۆت: «ئەڤە ژی وەكو هاندانەكێ بۆ پڕۆژەیێن وەبەرهێنانێ و گەرەنتیكرنا مافێ وەبەرهێنەران، زێدەتر دێ كارگەه و پڕۆژەیێن پیشەسازی هێنە تاپۆكرن و پڕۆژەیێن ئاكنجیبوونێ ژی دێ هێنە تاپۆكرن، ئەڤە ژی پێنگاڤەكا گرنگە بۆ كەرتێ وەبەرهێنانێ، سەرۆكێ ئەنجوومەنێ وەبەرهێنانێ ژی ماف هەیە ئەو پڕۆژەیێن زێدەتری 60%ێ تەمام ببیت بڕیارا تاپۆكرنێ ل سەر بدەت و هەژمارەكا زۆرا پڕۆژان ژی چەندین سالە تەمامبووینە و دەم هاتیە بهێنە تاپۆكرن».
دكتۆر محەمەد شوكری گۆتژی: «پلان ئەڤەیە د سالا 2024ێ دا دەستەیا وەبەرهێنانێ مۆهلەتێ بدەتە زێدەتری 200 پڕۆژەیان، ئەو پڕۆژەیێن ئەڤ سالە دهێنە بجهئینان زێدەتر پڕۆژەیێن پیشەسازی و چاندن و گەشتوگوزارینە، چونكی سیاسەتا حوكمەتا هەرێما كوردستانێ ئەڤەیە زێدەتر گرنگیێ ب ئەڤان سێ كەرتان بدەت، لەوڕا دێ مۆهلەتێن ئەڤ سالە زێدەتر بۆ ئەڤان كەرتان بن».
