دهۆكا كەڤن دێ هێتە نووژەنكرن
د. عەلی تەتەر، پارێزگارێ دهۆكێ دوهی 26/2/2024 سەرپەرشتیا كۆمبوونەكێ كر ل دۆر پڕۆژەیێ نووژەنكرنا تاخێن دهۆكا كەڤن پشتی قووناغا دیكیۆمێنت و دیزاینكرنێ ژ لایێ بسپۆرێن تایبەتمەند و رێڤەبەریێن پەیوەندیدار ڤە.
پشتی دانوستاندن ل دۆر ناڤەرۆكا پرۆسا دیكیۆمێنتكرن و دیزاینكرنێ، پارێزگارێ دهۆكێ لایەنێن پەیوەندیدار راسپاردن دەربازی قووناغێن دی یێن پراكتیكی ببن.
دیسا هەر دوهی د. عەلی تەتەر، پارێزگارێ دهۆكێ سەرپەرشتیا كۆمبوونا لژنا گەشەپێدان و پشتگریكرنا پیشەسازی ب ئامادەبوونا لایەنێن پەیوەندیدار كر.
د كۆمبوونێ دا پشتی دانوستاندن ل دۆر پڕۆژەیێن بۆ لژنێ هاتینە پێشكێشكرن و هەلسەنگاندنا وان، بڕیار هاتەدان بۆ تەرخانكرنا ئەردی بۆ 17 كارگەهێن نوو د بیاڤێن (قێرێ شل، بەرهەمئینانا شەربەتان، چێكرنا بەرهەمێن پلاستیكی، جلوبەرگان، بەرهەمئینانا قالبێن ئاڤاهیان، چێكرنا ساڤاری و داگرتنا هەمی جۆرێن ئاهێن خوارنێ، داگرتنا بتلێن غازا شل، چێكرنا بۆڕیێن ئاسنی، بەرهەمئینانا فلینێ دیكۆرێن خانیا، بۆڕیێن ئاسنی، بەرهەمێن خوارنێ یێن بەستیكری و بەرهەمئینانا بەفرێ).
پارێزگارێ دهۆكێ و سەرۆكێ لژنا گەشەپێدان و پشتگریكرنا پیشەسازی دۆپاتی ل پشتگریكرنا دروستكرنا كارگەهان و بەرهەمێن خۆمالی و پەیداكرنا دەلیڤەیێن كاری كرن.
