ئەگەر گەنجەكی 100 هزار دینار ژی هەبن بلا دەست ب كارێ تایبەت بكەت
ئەمیر ئەترووشی:
كچەكا دهۆك دیار كر، پێدڤیە هەر گەنجەك پشتبەستنێ ل سەر شیانێن خوە بكەت و خوە ب هیڤیا كەس و كار و دەوروبەران ڤە و خودان كاران ڤە نەهێلیت بۆ حوە كاری پەیدا بكەت و ئەگەر خوە ب تنێ 100 هزار دینار ژی هەبن، بلا دەست ب كارەكێ تایبەت بكەت و ببیتە خودان كار و گۆت: من ل 16 سالیێ دەست ب كاری كریە و نوكە ژیێ من 26 سالە و خودان كارێ خوە یێ تایبەتم و من نێزیكی حەفت كچان ژی ل دەڤ خوە داینە كاری.
مونا کوردی، كچەكا پارێزگەها دهۆكێ یە د دیدارەكێ دا دگەل رۆژنامەیا ئەڤرۆ دیار كر «ل 16 سالیێ هەستێ كاركرنێ ل دەڤ من پەیدا بوو، من بەری هینگی ل قوتابخانێ شیانێن هونەری هەبووینە و من ل گۆرەی وان شیانان دەست ب كاری كر، ب تایبەت د كارێن جوانكاریێ دا و من ل جوانكاریەكێ وەكو كارمەند كاركر و بۆ ماوەیەكێ درێژ من ل گەل هندەك كچ و ژنێن دی كاركر، هەتا شیایم بوویمە خودان كارێ خوە یێ تایبەت.
زێدەتر گۆت: ئەو پارێ من د وان چەند سالان دا وەرگرتی وەكو كارمەند كاركری من كۆمڤەكر و جوانكاریەك پێ ڤەكر و كارێ خوە یێ تایبەت كر، هەر چەندە من پارەیەكێ كێم هەبوو و ئەز گەلەك ترسیام كارێ تایبەت بكەن، لێ من پێ ل وێ وێرەكیێ دانا و دەستپێكر، من ل دەستپێكی ب تنێ كرە جهێ چێكرنا نینوكان و هندەك كەل و پەلێن كێم ئینان، لێ د ئەڤ سالە دا ئەز شیام جهێ خوە بەرفرەه بكەن و جوانكاریا خوە تمام بكەم و هندەك پشكێن دی ل جوانكاریا خوە زێدەكرن.
ل دور وێ پرسیارێ كا چ تشتی وەكر مونا بۆ خوە كارەكێ تایبەت بدانیت و ژ كارمەندیێ ل بەر دەستێ هندەك كەسێن دی رزگارببیت، مونایێ گۆت: بێگومان دەمێ مرۆڤ ل بەر دەستێ ئێكی كاربكەت یێ ئازاد نینە و كار ب دلێ مرۆڤی نابیت و فەرمان ل سەر مرۆڤی گەلەك یا نەخۆشە و ئیزعاجا مرۆڤی دهێتە كرن، وەكو دی ژی گرنگ ئەوە مرۆڤی ل شوونا بەردەستێ ئێكی بیت، ب تنێ كریا خوە ژی دەربێخت باشترە.
ئەو ژی ئاشكرا كر، دەمێ مرۆڤ خودان كار بیت و كچەك ل دەڤ مرۆڤی كاربكەت نابیت زێدە دگەل دا ببیتە هەڤال و نابیت ژی زێدەتر كونترۆلێ ل سەر بكەت و گۆت: سۆشیال میدیایێ گەلەك كارتێكرن ل سەر كارێ جوانكاریێ كریە، ب تایبەت كارێ چێكرنا نینوكان، گەلەك كچ ئێدی شارەزا بووینە و ئامیر بۆ خوە كڕینە و نینوكێن خوە ل مال چێدكەن.
مونا کوردی نە ڤەشارت ژی كو هەتا نوكە من شیایە حەفت كچان ل دەڤ خوە كاركرینە و ل دەڤ من فێری كاری بووینە و كچێن گەلەك زیرەك د وارێ جوانكاریێ دا ل دهۆكێ پەیدا بووینە و گۆت ژی: سۆشیال میدیایێ گەلەك كارتێكرن ل ژیانا من كریە و دەمێ كچەك ل سەر شۆشیال میدیایێ گەلەك ناڤدار ژی دبیت، پەیداكرنا دەلیڤێن كاری ل جهێن تایبەت بۆ وێ ب زەحمەت دكەڤن.
خویاژی كر، كارێ ریكلامێ هەتا رادەیەكی ل دهۆكێ بەر ب پێشڤەچوونێ یە و نها كارێ ریكلامی ل دهۆكێ یێ كێمە و هەر كەسەك ل سەر كارێ خوە ب تایبەت ریكلامێن خوە دكەت و تۆرا تیكتوكی ژی وەكریە ئێدی هەر كەسەك ئەو ب خوە ریكلامێ بۆ جهێ خوە بكەت و گۆت ژی: پێدڤیە هەر گەنجەك پشتبەستنێ ل سەر شیانێن خوە بكەت و خوە ب هیڤیا كەس و كار و دەوروبەران ڤە و خودان كاران ڤە نەهێلیت بۆ وی كاری پەیدا بكەت و ئەگەر خوە ب تنێ 100 هزار دینار ژی هەبن، بلا دەست ب كارەكێ تایبەت بكەت و ببیتە خودان كار.
