كۆنفرانسەك ب ناڤێ رۆلێ زانكۆ و پەیمانگەهان د پرسێن نەتەوەیی دا هاتە سازكرن
ب بەرهەڤبوونا پارێزگارێ دهۆكێ دوهی 27/2/2024 زانكۆیا دهۆك ب هەڤپشكی ل گەل كۆلیژا یاسا و پەیمانگەها ئارارات و دەزگەهێ شەهید یێ پەروەردە و خواندنا بلند كۆنفرانسەك بۆ بلندكرنا هەستێ نیشتمانی سازكر.
ب بەرهەڤبوونا د. عەلی تەتەر، پارێزگارێ دهۆكێ و د. عەبدولفەتاح عەبدولرەزاق، بریكارێ وەزارەتا خواندنا بلند و چەند بەرپرسێن حزبی و ئیداری و مامۆستا و قوتابیان ل هولا كۆنفرانسان و ل ژێر ناڤێ (رۆلێ زانكۆ و پەیمانگەهان د پرسێن نەتەوەیی دا)، زانكۆیا دهۆك ب هەڤپشكی ل گەل كۆلیژا یاسا و پەیمانگەها ئارارات و دەزگەهێ شەهید یێ پەروەردە و خواندنا بلند كۆنفرانسەك بۆ بلندكرنا هەستێ نیشتمانی سازكر.
د. شرین حسنی، راگرا پەیمانگەها ئارارات پەیڤا بخێرهاتنێ پێشكێشكر و ئارمانجێن كۆنفراسی بەرچاڤكرن و گۆت: «راسپاردێن كۆنفراسی بۆ وەزارەتا خواندنا بلند دێ هێنە پێشكێشكرن».
پارێزگارێ دهۆكێ د پەیڤەكێ دا تەكەز كر كو ئەركە سەمیانێن زارۆك و قوتابیان و كەرتێ پەروەردێ و زانكۆیێ هەر ژ قووناغا زارۆكینیێ و سەرەتایی و هەتا دگەهیتە قووناغا زانكۆیێ وان فێری ڤیانا وەلاتی و نیشتمانی و نەتەوەیی بكەن، ئەم دەستخوشیێ ل رێكخەرێن كۆنفرانسی دكەین و پشتەڤانیا حوكمەتا هەرێمێ بۆ ئەنجامدانا ڤان جۆرە كۆنفراسان دیار دكەین».
پاشی چار پانەلێستان، كو پێكهاتبوون ژ (د. چنار سەعەد عەبدوللا، د. سەباح ئیبراهیم، د. ئەڤین خالد و د. محەمەد ئیحسان) بابەتێن خوە پێشكێشكرن و گەنگەشە ل سەر هاتە كرن.
كۆنفرانس دێ سێ رۆژان بەردەوام بیت و چەند پرس ل دۆر هشیاریا نیشتمانی و نەتەوەیی دێ هێنە گەنگەشكرن.
دیسا د. عەلی تەتەر، پارێزگارێ دهۆكێ دوهی 27/2/2024 پێشوازی ل سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارێزگەها دهۆكێ یا پارتی دیموكراتی كوردستان و شاندێ د گەل دا كر و د هەڤدیتنەكێ دا باس ل هەماهەنگیا د ناڤبەرا كارێ حزب و حكومەتێ دا بۆ پتر خزمەتكرنا وەلاتیان هاتە كرن.
