ڕێز ل شەهید و نڤیسەر و هۆزانڤان مەلا ئەنوەر مایی هاتە گرتن
ئامێدیێ، مەحمود نهێلی:
ب بەرهەڤبوونا هیوا ئەحمەد، ئەندامێ مەكتەبا سیاسی یا پارتی و د. سالار عوسمان، بەرپرسێ پشكا رەوشەنبیری و ڕاگەهاندنا پارتی و بەرەڤان حەمدی، بەرپرسێ لقێ ١٨ و وارشین سەلمان، دەڤەردارێ ئامێدیێ و مالباتا شەهیدی و هەژمارەكا ڕەوشەنبیر و نڤیسەر و هونەرمەندان و ل ژێر درووشمێ (ئەنوەر مایی پیشەنگ ل شانۆیا نەورۆزێ)، ڕێورەسمەكێ ڕێزلێنانێ ل نڤیسەر و هۆزانڤان و پێشمەرگە، شەهید «مەلا ئەنوەر مایی» هولا پەروەردا ئامێدیێ هاتە گێڕان.
د. سالار عوسمان د پەیڤەكێ دا باس ل مێژوو و بزاڤا ڕەوشەنبیری یا كوردی و ڕۆلێ شەهید «مەلا ئەنوەر» كر و ئاشكرا كر، كو مەلا ئەنوەر مایی گەلەك پێش تەمەنێ خوە بوویە.
بەرەڤان حەمدی خەلاتێ رێزلێنانێ پێشكێشی مالباتێ كر و ژ لایێ مامۆستا مەعسوم مایی كورێ شەهید ئەنوەر مایی ڤە هاتە وەرگرتن.
هەر د ڤی رێورەسمی دا فلمەكێ دوكیۆمێنتاری ل سەر ژیان و خەباتا خودێ ژێرازی ئەنوەر مایی هاتە نیشادان و چەند پەیڤ هاتنە پێشكێشكرن.
نڤیسەر و هۆزانڤان و پێشمەرگە، شەهید «ئەنوەر شێخ محەمەد تاهر مایی» ل سالا ١٩١٣ێ ل گوندێ مایێ ل دەڤەرا بەرواریا ژ دایكبوویە و ل سالا ١٩٦٣ و ل سەردەمێ شۆڕەشا ئیلۆنێ شەهید بوویە.
