كۆنفرانسێ ئێكێ یێ ساخلەمیێ ل زاخۆ هاتە گێڕان
زاخۆ، عەلی حاجی:
ب بەرهەڤبوونا دكتۆر سامان بەرزنجی، وەزیرێ ساخلەمیێ یێ حوكمەتا هەرێما كوردستانێ و گوهدار شێخۆ، سەرپەرشتێ ئیدارەیا سەربخوە یا زاخۆ، رێڤەبەریا گشتی یا ساخلەمیا زاخۆ كۆنفرانسێ ئێكێ یێ پێداچوونێ گێڕا.
دكتۆر سامان بەرزنجی، وەزیرێ ساخلەمیێ د پەیڤەكێ دا دیار كر، كەرتێ ساخلەمیێ بەردەوام پێدڤی ب گەشەكرنێ یە و جیهانا تەكنەلۆژیایێ یا ساخلەمیێ ب شێوەیەكێ بلەزە و پێدڤیە دگەل وێ پێشڤەچونێ ژی بەردەوام كار بكەن و گۆت: «كابینەیا نەهێ یا حوكمەتا هەرێما كوردستانێ گرنگیەكا تایبەت دایە كەرتێ ساخلەمیێ و ئەڤ كەرتە بەرەڤ پێشچوویە، دێ بزاڤێ كەین هەڤسەنگیێ و خزمەتێن زێدەتر ل وان دەڤەران كەین یێن ژ دەرڤەی سەنتەرێ باژێران و دەڤەرێن سنووری، دیسا چەندین پڕۆژەیێن دیتر یێن ساخلەمیێ د رێدانە و دێ رێخوەشكەر بن ژ بۆ بەرەڤ پێشڤەچوونا ڤی كەرتی، ئەو كێم و كاسیێن د ناڤ كەرتێ ساخلەمیێ دا ل زاخۆ هەین، دێ بزاڤێ كەین چارەسەر بكەین».
گوهدار شیخۆ، سەرپەرشتێ ئیدارا سەربخوە یا زاخۆ گۆت: «ل دەستپێكا دەست ب كاربوونا مە وەكو سەرپەرشتێ ئیدارەیا سەربخوە یا زاخۆ، ژ كارێ پێشینەیێ مە پێشئێخستنا كەرتێن ساخلەمیێ و پەروەردێ بوون، ب پشتەڤانیا سەرۆكێ حوكمەتا هەرێما كوردستانێ مەسرور بارزانی مە شیا كارەكێ باش د وان كەرتان دا بكەین، ژ بۆ پێشئێخستنا كەرتێ ساخلەمیێ ل زاخۆ مە بۆردەك دروست كر و كار ل سەر دانانا پلانەكێ كر و مە شیا چەندین گوهۆرینان بكەین، د دەمێ بۆری ژی دا ب گوژمێ ١٦ ملیار دیناران پڕۆژە د كەرتێ ساخلەمیێ دا ل سنوورێ ئیدارەیا سەربخوە یا زاخۆ هاتینە ئەنجامدان».
