ئاكرێ ب فەرمی وەكو پایتەختێ نەورۆزێ دێ هێتە ناساندن
ئاكرێ، رەمەزان زەكەریا:
ئەڤ سالە 21 ێ ئادارێ دێ كەڤیتە د ناڤ هەیڤا رەمەزانێ دا بۆ ڤێ مەبەستێ لیژنێن سەرپەرشتیارێن كەرنەڤالا ئاگرێ نەورۆزێ ل ئاكرێ بریار دایە ئاگر پشتی فتارێ بهێتە هەلكرن.
د. دلاوەر بۆزۆ، دەڤەردارێ ئاكرێ د كۆنگرەكێ رۆژنامەڤانی دا راگەهاند: ئەڤ سالە حوكمەت دێ پشتەڤانیا نەورۆزا ئاكرێ كەت و پێشبینی دهێتە كرن رێژا گەشتیاران گەلەك ژ سالێن بۆری پتر بیت و گۆت: «ب پشتەڤانیا پارێزگارێ دهۆكێ بەر‌فرەهكرنا سەرێ گری یا بەردەوامە و هزار و 100 مەتران هاتیە بەرفرەهكرن، ئەڤە ژی دێ جوانیەكا دی دەتە گۆرەپانا كەرنەڤالا نەورۆزا ئاكرێ و جهێ پتر هەبیت بۆ پێشوازیا مێهڤانان».
ناڤهاتی گۆتژی: «ئەڤ سالە نەورۆزا ئاكرێ دێ جۆداهی هەبیت ژ لایێ ئاینی و نەتەوەیی ڤە، ژ بەركو كەرنەڤالا نەورۆزێ دێ كەڤیتە د ناڤ هەیڤا رەمەزانێ دا، لەو ئاگر پشتی فتارێ دێ هێتە هەلكرن و بازارێ شەڤێن رەمەزانێ یێ هەڤچەرخ ل ئاكرێ دێ هێتە ڤەكرن».
دەڤەردارێ ئاكرێ خویا ژی كر، ئەڤ سالە حوكمەت دێ ئاهەنگا نەورۆزێ ل ئاكرێ ب رێڤەبەت، دیسا بڕیارە ئەڤ سالە ئاكرێ ب فەرمی وەكو پایتەختێ نەورۆزێ ژ لایێ حوكمەتا هەرێما كوردستانێ ڤە بهێتە ناساندن.
