ژنێن دوگیان و هـەیڤا رەمەزانێ
بەرپەرێ ساخلەمیێ:
ژنا دوگیان وەكو ژنەكا سروشتی یە ل دەمێ ساخلەمیا وێ یا باش بیت، گەلەك دەمژمێرێن رۆژیگرتنێ هەكە كارتێكرن ل ساخلەمیا وێ كر، یانژی هەكە ل هەر سێ مەهێن دووماهیێ بوو و تووشی تەنگەزاریێن ساخلەمیێ بوو و رەوشا وێ تێكچوو، یان هەكە دیت كارتێكرن دێ ل ساخلەمیا زارۆیێ وێ هێتە كرن، رێك بۆ دهێتە دان رۆژیا نەگریت، ل حالەتێن سروشتی چو ئاریشە نینن و پێدڤیە رۆژیان بگریت.
د.ئەمەل عەبدولحەكیم، تایبەتمەندا نەخۆشیێن ژنان و زارۆبوونێ دیاركر كو رەمەزانا ئەڤ سالە د وەرزێ هاڤینێ دایە و گەلەك یا ب زەحمەتە روژیگر 17 دەمژمێران ب روژینە، ژنا دوگیان ژی دڤێت روژیێن خوبگریت چونكی ژنا دوگیان وەك ژنا نەدوگیانە ئەگەر ساخلەمیا وێ یاباش بو و چ كارتێكرن لێ نەبوو دێ شێت روژیاخوە ب شێوەكێ نورمال بگریت ب مەرجەكی ئەو دەمژمێرێن دناڤبەرا پاشیڤ و فتارێدا هند خوارنێ و شلەمەنیا ڤەخوت كو ب روژێ كارتێكرنێ ل وێ و زارویێ وێ نەكەت.
د.ئەمەل عەبدولحكیم تایبەتمەندا ژنان و زاروبوونێ دیاركر ژی پێدڤیە ژنا دوگیان خوارنێ ب جارەكێ لسەر ئێك نەخوت، چونكی دێ كارتێكرنێ ل مەعیدا وێ كەت، بەلكو یا پێدڤیە خوارنا خوە بكەتە سێ (وەجبە) دناڤبەرا فتارێ و پاشیڤێدا و گۆت: پێدڤیە ژنا دوگیان خورمێ و قەسپا بخوت شووینا شرینیێن دی وەك زەلابی و بەقلاوێ، چونكی زور ب روین و شەكرن ئەڤەژی دێ كارتیكرنێ ل ساخلەمیا وێ كەت.
تایبەتمەندا نەخۆشیێن ژنان ئەوژی دیاركر پێدڤیە ژنا دوگیان گوشتی و فێقی و پروتینا بخوت و رێژەكا زورا ئاڤێ ڤەخوت كو نێزیكی 10 تا 15 گلاسا دپێڤینە و گۆت: یابێدڤیە ژنا دوگیان پاشیڤا خوە درەنگ بخوت دا ئەو دەمژمێرێن روژێ یێن درێژ كارتیكرنێ لێ نەكەن، هەروەسا گەلەك كەسكاتیا بخوت، چونكی كەسكاتی ناهێلیت (قەبزبون).
هەروەسا د.ئەمەلێ دیاركر كو ل سێ مەهێن دەستپێكێ (معیدا )ژنا دوگیان نەیا درستە بەردەوام دلێ وێ رادبیت و دگەل دلرابوونێ گەلەك شلەمەنی و (معادن)ژ لەشێ وێ دەردكەڤن، لەو را رەنگە ئەڤ دەمژمێرن درێژ كارتێكرنێ ل وێ و زارویێ وێ بكەت و گۆت: د ڤی حالەتی دا وێ مافێ هەی روژیا خوە بخوت و پشتی زارۆیێ خوە ددانیت وێ روژیێ بگریتەڤە ،گوت: هەرسێ مەهێن نیڤەكێ ئاسانترن بو ژنا دوگیان ژ مەهێن دەستپێك و دووماهیێ، چونكی ل مەهێن دووماهیێ فشارا خوینێ یا بلند بیت یان نەخوشیا شەكرێ هەبیت یان میلاكێن وێ نە د دروست بن یان ژانێن بەری وەختی بێنێ، یان زارویێ وێ بەری وەختی ژ دایك بیت لڤی دەمی ژی ماف یێ هەی روژیا خوە بخوت. دیسان پشتی ژنێ زارۆ دبیت پێدڤیە ل وی دەمی ژی گەلەك شلەمەنیا و خوارنێن باش بخوت دا شیر تێرا زارویێ وێ بكەت، ل دەمێ یا ب روژی، بەلێ هەكە دیت ساخلەمیا وێ نە یا باشە و زارویێ وێ زور یێ زەعیفە و شیرێ وێ بەرەڤ كێمبوونێ ڤە دچیت درستە د ڤێ ماوەی دا روژیا خو بخوت.
