ساخلەمیا دهۆكێ هەژمارەكا رێنمایێن تایبەت بۆ مەها رەمەزانێ دەرئێخستن
دهۆك، لەزگین جوقی:
ب هەلكەفتنا هاتنا مەها رەمەزانا پیرۆز و ژ پێخەمەت پاراستنا ساخلەمیا گشتی و پاراستنا ساخلەمیا رۆژیگران، بڕیار هاتەدان رێنمایێن تایبەت ب مەها رەمەزانێ ڤە بهێنە بەلاڤكرن و پێگیری پێ بهێتە كرن، هەر جهەكێ پێگیر نەبیت ژی دێ كەڤیتە بەر سزایێن یاسا ساخلەمیا گشتی.
رێڤەبەریا كاروبارێن خوپاراستنا ساخلەمیێ پارێزگەها دهۆكی دیار كر، دڤێت هەمی جهێن چێكرنا شەربەتان و تەزیاتیان ئامیرێن پارزنین و تافلیكرنا ئاڤێ ب قەبارێن مەزن بدانن و نابیت گوشت ژ دەرڤەی جامخانان و تەزیكەران بهێتە دانان و ئەو جهێن شەربەت لێ دهێنە چێكرن و ئامادەكرن دڤێت دەستووریا ساخلەمیێ هەبیت.
رێڤەبەریا كاروبارێن خوپاراستنا ساخلەمیێ پشكا چاڤدێری و سەلامەتیا خوراكی ل پارێزگەها دهۆكی خویا كر، دڤێت شەربەت د ناڤ تەزیكەران دا بهێنە هەلگرتن و دانان و نابیت ب هیچ رەنگەكی ل سەر ستێركا و ژ دەرڤەی دوكانێ بهێنە دانان و دڤێت ب تنێ بۆ رۆژەكێ شەربەت بهێتە دروستكرن و ئامادەكرن و نابیت بمینیت بو رۆژا پاشتر و مێژوو ل سەر بتلێن شەربەتێ بهێتە دانان، دیسا نابیت شەربەت ل سەر عەرەبانان و ل سەر شوستەیان بهێتە دانان و فروتن.
ساخلەمیا دهۆكێ ئاشكرا ژی كر، دروستە شەربەت ل ماركێت و دوكانا ژی بهێتە فرۆتن، لێ دڤێت ژ جهەكێ دەستووردای شەربەتان بینن و لێبلێ جهێ چێكرنا شەربەتێ لسەر بیت.
رێڤەبەریا كاروبارێن خوپاراستنا ساخلەمیێ ل پارێزگەها دهۆكی دیار كر، قەدەغەیە هەمی جۆرێن شریناهیا و هەڤیران بهێنە چێكرن، ژبلی كارگەهێن شریناهیان یێن دەستووریا ساخلەمیێ هەی و ل دەمێ بەلاڤكرنێ ژی دڤێت لێبلێ كارگەهێ و مێژوویا چێكرنێ و سەرڤەچوونێ ب ئاشكرایی ل سەر بەرهەمێن وان بیت و نابیت ب هیچ رەنگەكی شریناهی بەقلاوە، زەلابی، كونافە لسەر عەرەبانا و سەرجادا و رەسیفا و جهێن ڤەكری بهێنە فرۆتن.
ساخلەمیێ خویا كریە، نابیت گوشت ژ دەرڤەی جامخانان و تەزیكەران بهێتە دانان و پشتی دەمژمێر12ێ نیڤرۆ، دڤێت گوشت بهێتە هەلگرتن د تەزیكەران دا و نابیت ئاژەل بهێنە سەرژێكرن ژ دەرڤەی سەربرخانەیێن دەستووردای و دڤێت هەمی كەلەخێن ئاژەلی یێن سەرژێكری مورا ڤیتێنەریێ ل سەر هەبیت.
ساخلەمیا دهۆكێ ئەوژێ راگەهاند، جگارە كێشان قەدەغەیە ل هەمی جهێن خوارن لێ دهێتە پێشكێشكرن و نابیت شریناهی و شەربەت بهێنە چێكرن و فرۆتن ل جهێن رێ پێ نەدای بۆ ڤی كاری، وەك: خوارنگەهـ، چایخانە، دوكانێن تەنزیلات و ئامانان، ب تنێ ل تەزیاتی و شریناهیان رێ پێ هاتیە دان ڤی كاری بكەن.
