هزار وانەبێژ ل شنگالێ دێ هێنە دامەزراندن
هاریكارێ پارێزگارێ نەینەوا دیار كر، ل دەڤەرداریا شنگالێ و د ناڤا ئاوارەیان دا دو ئاریشە هەبوون، ئێك ژ وان هاتە چارەسەركرن، كو دامەزراندنا هزار وانەبێژایە، یا دیتر ژی هەلوەشاندنا نوونەراتیا پەروەردێیە ل هەرێمێ، كو دێ ئاریشەكا مەزن بۆ ئاوارەیان دروست كەت، ئەم وەكو فراكسیۆنا پارتی بەردەوام ل سەر خەتین ژ بۆ چارەسەركرنا ئاریشەیێن خەلكێ خۆ.
رەفعەت سمۆ، هاریكارێ پارێزگارێ نەینەوا بۆ رۆژناما ئەڤرۆ دیار كر، داخستنا هەردو نوونەراتیێن پەروەردێ ل هەرێما كوردستانێ دێ ئاریشەكا مەزن بۆ ئاوارەیان دروست كەت، چونكی نوكە ل كەمپێن دهۆكێ 200 هزار ئاوارە هەنە و ئەو ئاوارە د بەرهەڤ نینن ڤەگەڕنەڤە سەر جهـ و وارێن خۆ، چونكی هەتا نوكە دەڤەرێن وان نەهاتینە ئاڤاكرن و دەڤەرێن وان نەدئارامن، لەوما ئەو بڕیارا حكومەتا ئیراقێ دایی، دێ ئاریشەكا مەزن بۆ قوتابیان دروست كەت و گۆت: «هەتا نوكە شنگال نەهاتیە ئاڤەدانكرن و ژ بەر هەبوونا گرۆپێن چەكدار ئێمناهی لێ نینە، د هەمان دەم دا وەزارەتا كۆچ و كۆچبەرێن ئیراقێ ئەو بڕیارە بێی دیراسەتكرن دایە و پەرلەمانتارێن پارتی ژی ل سەر وی بابەتی ل سەر خەتن بۆ هندێ چارەسەر بكەن».
ناڤهاتی گۆتژی: 17 هزار پلێن دامەزراندنێ د هەموو بیاڤان دا بۆ نەینەوا هاتینە دانان، هەروەسا ل سالا 2019ێ هزار وانەبێژ ل شنگالێ هەبوون، كو نەهاتبوونە دامەزراندن، بەلێ ب بزاڤێن پەرلەمانتارێن فراكسیۆنا پارتی، وەسا بڕیارە ژ وان 17 هزار كەسان هزار پلەیان بدەنە شنگالێ و ئەو وانەبێژە بهێنە دامەزراندن، هەروەسا سەرۆكوەزیرێن ئیراقێ رازیبوویە و ئەوێن ماین ژی، كو هزار كەسن گرێبەستێن وان چێكەن بۆ دەمێ سێ سالان و پاشی دێ كار كەین بۆ هندێ ببنە فەرمی، هەروەسا ژ وان 17 هزار گرێبەستێن بۆ نەینەوا هاتین، هەشت هزار دێ بۆ كەرتێ پەروەردێ بن».
