بنگەهێ لالش دخوازیت كارێ یونیتاد بۆ ڤەكۆلینێن تاوانێن داعشێ بەردەوام بیت
لەزگین جوقی:
سەرۆكێ دەستەیا بلندا بنگەهێ لالش یێ ڕەوشەنبیری و جڤاكی ل دهۆكێ دیار كر، ئەو دخوازن كارێ یونیتاد بۆ ڤەكۆلینێن تاوانێن تیرۆرستێن داعشێ بەردەوامی پێ بێتەدان و دبێژیت: هەتا نوكە جینۆسایدا ئێزدیان ل شنگالێ یا بەردەوامە.
سەعید جردۆ، سەرۆكێ دەستەیا بلندا بنگەهێ لالش یێ ڕەوشەنبیری و جڤاكی ل دهۆكێ بۆ رۆژناما ئەڤرۆ ئاشكرا كر، تیما یونیتاد بۆ دیكیۆمێنتكرنا بەلگەنامەیێن تاوانێن داعشێ بەری ئەركێ خوە تەمام بكەت، دشێت راپۆرتەكێ ل دۆر جینۆسایدا ئێزدیان پێشكێشی جڤاتا ئاسایشا نێڤدەولەتی بكەت.
سەعید جردۆ گۆت: «تیما یونیتاد یا نێڤدەولەتی، كو ئەركێ وێ دیكیۆمێنتكرنا بەلگەنامەیێن تاوانێن داعشێ یە، بەری كارێ خوە تەمام بكەت، دشێت هەلویستەكێ شەرەفمەندانە د ڕێبازا مرۆڤایەتیێ دا تۆمار بكەت، ئەو ژی راپۆرتەكێ پێشكێشی جڤاتا ئاسایشا نێڤدەولەتی بكەت ل گۆڕەی ئەوا د ماوێ كارێ خوە دا ب دەستڤەئینای و بۆ وان هاتیە سەلماندن، تاوانا ب سەرێ ئێزدیان هاتی ب هەموو پیڤەران جینۆسایدە».
