پارێزگارێ دهۆكێ بەرێ بنیاتی بۆ هەژمارەك پڕۆژەیان ل دەڤەرا ئامێدیێ دانا
ئامێدیێ، مەحمود نهێلی:
د بەردەوامیا گەهاندنا پڕۆژەیێن خزمەتگوزاری دا بۆ دەڤەرداریێن جودا، ل ژێر چاڤدێری و بــەرهەڤبوونا د. عەلی تەتەر، پارێـــزگارێ دهــــۆكێ و وارشین سەلمان، دەڤەردارێ ئامێدیێ و بـەرەڤان حەمدی، بەرپرسێ لقێ ١٨ یێ پارتی و هەژمارەكا رێڤەبەرێن پەیوەندیدار یێن میری بەرێ بنیاتی بۆ هەژمارەكا پڕۆژەیان ل سنوورێ ناوچەداریێن سەرسنك و چەمانكێ ل دەڤەرداریا ئامێدیێ هاتە دانان.
ئەڤ پرۆژەیە، كو پرانیا وان یێن كەرتێ رێكوپران بوون، زێدەتر ژ شەش ملیار دیناران بۆ هاتینە تەرخانكرن و پڕۆژەیێن سنوورێ ناوچەداریا چەمانكێ گوژمێ پتر ژ سێ ملیار دیناران بۆ هاتینە تەرخاكرن و پێك دهێن ژ چێكرنا رێكا گەلیێ چەلۆكێ – سیارێ ب درێژاهیا حەفت كیلۆمەتران ب گوژمێ ئێك ملیار و ٣٧٤ ملیۆن دیناران، چێكرنا رێكا گەلیێ ئاڤۆكێ ب درێژاهیا شەش كیلۆمەتران و ب گوژمێ ئێك ملیار و ٣٢ ملیۆن دیناران و چێكرنا رێكا گوندێ سپیندارێ – چەلۆكێ ب درێژاهیا سێ كیلۆمەتران و ب گوژمێ ٦٥٩ ملیۆن دیناران و گەهاندنا هێلا كارەبێ بۆ گوندێ ئاڤۆكێ و گەلیێ ئاڤۆكێ ب گوژمێ ٢١٦ ملیۆن دیناران ل سنوورێ ناوچەداریا چەمانكێ.
هەروەسا ل سنوورێ ناوچەداریا سەرسنكێ ژی بەرێ بنیاتی بۆ هەژمارەكا پڕۆژەیان ب گوژمێ دو ملیار و ٣٧٥ ملیۆن دیناران هاتە دانان.
د. عەلی تەتەر، پارێزگارێ دهۆكێ د كۆنگرەكێ رۆژنامەڤانی دا دیار كر، ل دووڤ رازیبوونا جەنابێ مەسرور بارزانی، سەرۆكێ حكومەتا هەرێما كوردستانێ و ل سەر بودجا تایبەت یا پارێزگەهێ ئەڤ پڕۆژە دێ هێنە ئەنجامدان و گۆت: «ب چێكرنا ڤان پڕۆژەیان دێ بزاڤەكا خۆرت یا ئاڤەدانیێ ل دڤەرێ پەیدابیت و ب تایبەتی گەشتوگوزار دێ پتر پێشكەڤیت و تەكەز ژی كر، د حەفتیێن بهێن دا هەژمارەكا دی یا پڕۆژەیێن نوو ل هەموو ناوچەداریێن سنوورێ دەڤەرداریا ئامێدیێ دێ هێنە راگەهاندن و بجهئینان».
دیسا هەر د بەردەوامیا سەرەدانا دكتۆر عەلی تەتەر، پارێزگارێ دهۆكێ دا بۆ سنوورێ دەڤەرداریا ئامێدیێ ل كۆمەلگەها قەدشێ یا سەر ب ناوچەداریا سەرسنكێ ڤە دیاریا سەرۆكێ حوكمەتا هەرێما كوردستانێ كو (خانیەك) بوو رادەستی (سەمیر عەبدوللا ئەحمەد) پێشمەرگەیێ شەهیدێ زندی، پەككەفتیێ شەرێ داعشێ كر.
