ل زاخۆ ٥٠ شوقە ل سەر خێزانێن كێمدەرامەت هاتنە بەلاڤكرن
زاخۆ، دلۆڤان هالۆ:
شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو ل شەڤا جەژنا ڕەمەزانا پیرۆز، ب پشتەڤانیا مەسرور بارزانی، سەرۆكێ حكومەتا هەرێما كوردستانێ، گوهدار شێخۆ، سەرپەرشتێ ئیدارەیا سەربخوە یا زاخۆ ٥٠ شوقە پێشكێشی خێزانێن كێمدەرامەت كرن.
بەرپڕسێ ڕاگەهاندنا ئیدارەیا سەربخوە یا زاخۆ، ئاماژە ب وێ چەندێ ژی كر، د مەها ڕەمەزانێ دا پێنج هزار خێزان ژ وەرگرتنا گوژمەیێن پارەیی و دابینكرنا كاری بۆ خێزانێن كێمداهات و ئەداكرنا كریێن خانیان و دابینكرنا دەرمانان ژ بۆ نەخوشیێن دۆمدرێژ و نشتەرگەریان مفاداربوون، دیسا دابینكرنا 10 هزار كارتۆنێن ئەرزاقی ب پشتەڤانیا دەولەمەندێن زاخۆ و خوارنا فتارێ بۆ هەر ٣٠ ڕۆژێن رەمەزانێ هاتنە دابینكرن.
سەرپەرشتێ ئیدارەیا سەربخوە یا زاخۆ د كۆنگرەیەكێ ڕۆژنامەڤانی دا گۆت: «خزمەتكرنا خەلكی ئەركە و چ منەت تێدا نینە، ل گورەی بەرنامێ هاتیە دارێژتن ل ژێر سەرپەرشتیا كەسێن بسپۆر و تایبەتمەند خێزانێن كێمداهات هاتبوونە ڤاڤارتن و جهێ دەستخوەشیێ نە».
