سەرۆك كۆمارێ توركیا دێ سەرەدانا هەرێما كوردستانێ كەت
سەرۆك كۆمارا توركیا دێ سەرەدانا ئیراقێ و هەرێما كوردستانێ كەت كو پرسا دوبارە هنارتنا پەترۆلا هەرێما كوردستانێ دێ ئێك ژ گرنگترین تەوەرێن سەرەدانا وی بیت.
رەجەب تەیب ئەردۆگان، سەرۆك كۆمارا توركیا ئەڤرۆ دوشەمبی 22/4/2024 ب سەرەدانەكا فەرمی دێ گەهیتە بەغدا و ل گەل بەرپرسێن بلند یێن ئیراقی دێ كۆمبیت و پاشی دێ سەرەدانا هەرێما كوردستانێ كەت ودێ پرسا دوبارە هنارتنا پەترۆلا هەرێما كوردستانێ ب رێكا بۆرییا پەترۆلی ل بەندەرێ جەیهان یێ توركی ئێك ژ گرنگترین ئەوان بابەتێن دێ دانوستاندن ل سەر هێنە كرن د سەرەدانا وی دا.
هەر سەبارەت ناڤەرۆكا كۆمبوونێ، محەمەد شیاع سۆدانی، سەرۆك وەزیرێن ئیراقێ پێشتر راگەهاندبوو» دانوستاندنێن هەستیار د سەردانا سەرۆك كۆمارا توركیا بۆ ئیراقێ ل دۆر چەندین بابەتێن گرنگ ژ ئەوان ژی پرسا ئاڤێ و ئاسایشێ و بازرگانیێ دێ هێنە ئەنجامدان».
ژ ئالیێ خوەڤە رەجەب تەیب ئەردۆگان، سەرۆك كۆمارا توركیا سەبارەت ناڤەرۆكا سەرەدانا خوە راگەهاندبوو كو پشتی سەرەدانا بەغدا دێ سەرەدانا هەولێرێ كەت و چەندین پرس ژ ئەوان ژی پەیوەندیێن دو قۆلی و پەیوەندیێن هەولێرێ و بەغدا ل گەل بەرپرسێن بلند یێن هەرێما كوردستانێ گەنگەشە كەت.
