دەست ب چێكرنا پڕۆژەیێ رێیا پـیادە ل دەوروبەرێن ئامێدیێ هاتە كرن
ئامێدیێ، مەحمود نهێلی:
ژ بۆ پتر گرنگیدان ب كەرتێ گەشتیاری و راكێشانا گەشتیاران بۆ دەڤەرێ دەست ب پڕۆژەیەكێ نوو یێ گەشتیاری ل دەڤەرا ئامێدیێ هاتە كرن و گوژمێ دو ملیار و ٣١٨ ملیۆن دیناران بۆ هاتینە تەرخانكرن.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، ئەڤ پڕۆژە یێ گەشتیاریە و نوكە كەفتیە د قووناغا بجهئینانێ دا و گۆت: «ئەڤ پڕۆژەیە پێك دهیت ژ رێیەكا پییادە، كو ل دۆر كەلها ئامێدیێ دزڤڕیت و چەندین جهێن بێهنڤەدانێ تێدا هەنە زێدەباری فرۆشگەهان».
دەڤەردارێ ئامێدیێ ئاماژە ب وێ چەندێ ژی كر كو ئەڤ پڕۆژەیە دێ بیتە ئەگەرێ پتر پێشخستنا كەرتێ گەشتیاری ل ئامێدیێ و راكێشانا گەشتیاران بۆ دەڤەرێ ب گشتی، هەروەسا دێ دەلیڤەیێن كاری ژی بۆ گەنجێن مە ل ڤێ دەڤەرێ پەیدا كەت.
وارشین سەلمان ئاشكرا ژی كر، ژ بۆ ئەنجامدانا ڤی پڕۆژەی گوژمێ دو ملیار و ٣١٨ ملیۆن دیناران هاتینە تەرخانكرن و هیڤی ژی خواستن، كو ئەڤ پڕۆژەیە د دەمێ خوە یێ دیاركری دا ب داوی بهێت و بكەڤیتە د خزمەتا خەلكێ دەڤەرێ و كەرتێ گەشتیاری و گەشتیاران دا.
