هەژمارەكا خێزانێن ئاوارە ژ كەمپا ئێسیان ڤەگەڕیانە شنگالێ
دهۆك، لەزگین جوقی:
رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ دیار كر، دوهی 20/5/2024ێ ب هەڤكاری ل گەل رێكخراوا lom و ئیدارا پارێزگەها دهۆكێ و دەزگەهێ خێرخوازیێ بارزانی 80 خێزانێن ئاوارە ل كەمپا ئێسیان یا سنوورێ ناوچەداریا باعەدرێ زڤڕینە شنگالێ.
پیر دەیان جەعفەر، رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ بۆ ئەڤرۆ گۆت: «هێشتا 70% ئاوارەیێن د ناڤ كەمپان دا ئاكنجینە و خەلكێ شنگالێنە و30% ژی ئاوارە ڤەگەڕیاینە، هەتا نوكە نێزیكی 330 هزار كەسێن ئاوارە د ناڤ كەمپ و دەرڤەی كەمپان دا ل سنوورێ پارێزگەها دهۆكێ ماینە و نەشیاینە ڤەگەڕن، ئەم هەمی ئاسانكاریان بۆ وان ئاوارەیان دكەین، یێن كو حەزا زڤڕینا شنگالێ هەی و دەرگەهـ دڤەكرینە، هەر رۆژا وان بڤێت دشێن ڤەگەڕن و هەتا ئاوارە بمینن خزمەتا وان دێ هێتە كرن».
گۆتژی: «هەمی ئاوارە د ئازادن بۆ زڤڕینا شنگالێ، ئاوارە دشێن ناڤێن خوە ل رێكخراوێ تۆمار بكەن بۆ زڤڕینا شنگالێ، وەزارەتا كۆچ و كۆچبەرێن ئێراقێ راگەهاندیە، ئەڤ سالە دەرگەهێ كەمپان دێ هێتە دائێخستن، لێ ئەم چو ئاوارەیان ب زۆری ڤەناگەڕینین».
