ئامیرێن پێشكەفتی یێن ئاگرڤەمراندنێ هاتینە دابینكرن
هەولێر، قائید میرۆ:
پەیڤدارێ بەڕەڤانیا باژێڕی ل هەرێما كوردستانێ راگەهاند، وەزارەتا ناڤخوە یا حوكمەتا هەرێما كوردستانێ ئامیرێن پێشكەفتی یێن ئاگرڤەمراندنێ بەلاڤكرینە و دبێژیت: نوكە شوقە و ئاڤاهیێن بلند هاتینە ئاڤاكرن، لەو مە پێدڤی ب تەكنیكا نوو یا ئاگرڤەمراندنێ هەیە.
سەركەوت كاڕەش، پەیڤدارێ بەڕەڤانیا باژێڕێ ل هەرێما كوردستانێ بۆ رۆژناما ئەڤرۆ دیار كر، د سەردەمێ نوكە دا ل گەل بەرێ جودایە و نوكە ئاڤاهیێن بلند و شوقە و جهێن ئاسێ هەنە و گۆت» ئەم د دەمێ پەیدابوونا روودانێن ئاگرڤەمراندنێ دا پێدڤی بكارئینانا تەكنیكا نوو و ئامیرێن سەردەم دبین، لەوڕا وەزارەتا ناڤخۆ بەردەوام بزاڤان دكەت ئامیرەیێن پێشكەفت ییێن ئاگرڤەمراندنێ بۆ حالەتێن ئاگربەربوونێ دابین بكەت، نوكە هەژمارەكا ترۆمبێلێن پێشكەفتی هاتینە بەلاڤكرن، ژ وان ژی: ترۆمبێلێن مێكزەمین یێن ئاگرڤەمراندنێ، چونكی جهێن ئاسێ هەنە و ترۆمبێلێن ئاگرڤەمراندنێ ناگەهنێ».
سەركەوت كاڕەش گۆتژی: «ژ بلی ترۆمبێلان ئامیرەیێن پێشكەفتی هاتینە بەلاڤكرن و د دەمێ پەیدابوونا ئاگری و روودانێن سروشتی دا دهێنە بكارئینان، ئەڤ سالە زۆرترین حالەتێن خەندقینێ هاتینە تۆماركرن و هەتا نوكە 26 كەس د ئاڤێ دا خەندقینە زۆربەیا كەسێن د ئاڤێ دا خەندقین ژی كەسێن نەشارەزا و خەلكێ دەرڤەی هەرێما كوردستانێ نە ب مەرەما گەشتێ دهێنە دەڤەرێن جودا یێن هەرێما كوردستانێ».
