ناڤێ هەموو توهمەتبارێن ژ قانوونێ رەڤین د ناڤا سیستەمەكێ ئەلكترۆنی دا هاتینە تۆماركرن
هەولێر، قائید میرۆ:
پەیڤدارێ پۆلیسێن هەرێما كوردستانێ ئاشكرا كر، ناڤێ هەموو تۆمەتبارێن ژ قانوونێ رەڤین د ناڤا سیستەمەكێ ئەلكترۆنی دا هاتینە تۆماركرن و دبێژیت: ئەگەر تۆمەتبار سەرەدانا فەرمانگەهێن وەزارەتا ناڤخۆ بكەت بۆ هەر كارەكی ئێكسەر دێ هێتە دەستەسەركرن.
موقەدەم كارزان ئەمیر، پەیڤدارێ پۆلیسێن هەرێما كوردستانێ بۆ رۆژناما ئەڤرۆ دیار كر، هەر تۆمەتبارەكێ جهێ ئاكنجیبوونا وی دیاربیت ژ ئالیێ هێزێن ئەمنی و پۆلیسان ڤە دێ هێتە دەستەسەركرن و گۆت: «نوكە سیستەمەك دهێتە بجهئینان، كو تێدا ناڤێ هەموو تۆمەتبارێن داخوازكری ل فەرمانگەهێن سەر ب وەزارەتا ناڤخۆ دهێتە بەلاڤكرن و كەسێ تۆمەتبار دەمێ سەرەدانا ئێك ژ وان فەرمانگەهێن وەزارەتێ دكەت بۆ هەر مەرەمەكێ ئێكسەر دێ هێتە دەستەسەركرن و رادەستی وی بنگەهێ پۆلیسان هێتە كرن یێ تۆمەتبار داخوازكری، ئانكو ئەگەر تۆمەتبارەك سەرەدانا پۆلیسێن هاتنوچوونێ ژی بكەت بۆ مامەلەیێن تڕۆمبێلێ دێ هێتە دەستەسەركرن».
موقەدەم كارزان ئەمیرگۆتژی: « كەسێن ژ قانوونێ رەڤین، ناڤێن وان كەفتینە د ناڤا سیستەمێ پۆلیسان و هەر وەلاتیەكێ سەرەدانا فەرمانگەهێن وەزارەتا ناڤخۆ بكەت بەری دەستپێكرنا مامەلەیان، ناڤێ ئەڤی كەسی ل كۆمپیۆتەری دێ هێتە پشكنین و ئەگەر یێ داخوازكری بیت دێ هێتە دەستەسەركرن، ئەڤە ژی پلانەكا باشە بۆ دەستەسەركرنا وان كەسێن ژ لایێ پۆلیسان داخوازكری و خوە ڤەشارتی».
