پارێزگارێ دهۆكێ ل بەلجیكا پشكداری د رێورسمێن نووژەنكرنا شوونوارێن دهۆك و هەولێرێ دا كر
ل دووڤ ڤەخواندنەكا فەرمی یا رێكخراوا یونسكۆ و ئێكەتیا ئەورۆپی ل رۆژا 22/5/2024 ل بروكسل ل وەلاتێ بەلجیكا د. عەلی تەتەر، پارێزگارێ دهۆكێ وەكو سەرۆكێ شاندێ حوكمەتا هەرێما كوردستانێ و ب ئامادەبوونا دلاوەر ئاژگەیی، بەرپرسێ نوونەراتیا حوكمەتا هەرێما كوردستانێ ل ئێكەتیا ئەورۆپی و ئەحمەد تەحسین بەرواری، بالیۆزێ ئیراقا فیدرال و بالیۆزێن وەلاتێن چەندین وەلاتان و بەرپرسێ پروگرامێن ئێكەتیا ئەورۆپا ل رۆژهەلاتا ناڤەراست پشكداربوون د رێورسمێن بەرنامێ (مەدەد) یێ تایبەت ژ بۆ هاریكاریكرن و پەیداكرنا دەلیڤەیێن كاری بۆ ئاوارە و پەنابەرێن سووری و وەلاتیێن وان وەلاتا ئەوێن ئەو پەناهندێن سووری مێهڤان كرین.
پارێزگارێ دهۆكێ بناڤێ خۆ و خەلكێ كوردستانێ سوپاسیا رێكخراوا یونسكۆ یا نەتەوێن ئێكگرتی و ئێكەتیا ئەورۆپی كر، ژ بۆ ئەو كار و خزمەتا د بیاڤێ نووژەنكرنا شوونواران دا و گەشەپێدانا بیاڤێ خواندن و پەروەردێ و نەهێلانا نەخواندەواریێ پێشكێش دكەن و خواست ئەڤ پرۆگرام و پشتەڤانیە ژ لایێ ئێكەتیا ئەورۆپی و رێكخراوا یونسكۆ یا بەردەوام بیت.
سەبارەت شوونوارێن شكەفتا شانەدەر و ڤەدیتنا هەستیكێن مرۆڤێن نیاندەرتال، پارێزگارێ دهۆكێ گوت: «بەرپرسێن وەلاتێ بەلجیكا داخوازكریە سەرا شكەفتا شاندەر بدەن و ئەوێ ڤەدیتنێ پتر سەرنجا گەشتیار و حەژێكەرێن شوونواران راكێشیە و دێ بیتە ئەگەرەك، كو هەرێما كوردستانێ ل سەر نەخشێ جیهانێ پتر ب خەلكی بهێتە ناساندن و گەشتیار پتر قەستا هەرێمێ وپارێزگەها دهۆكێ بكەن».
ل دووماهیێ پارێزگارێ دهۆكێ لوگۆیێ پارێزگەهێ وەكو خەلاتەكێ رێزگرتنێ پێشكێشی بەرپرسێن ئێكەتیا ئەورۆپی و رێكخراوا یونسكۆ كر هەمبەر خزمەتا وان ل هەرێما كوردستانێ.
هەژی گوتنێ یە رێكخروا یونسكۆ ب پشتەڤانیا ئێكەتیا ئەورۆپی كارێ نووژەنكرنێ ل سەر (شكەفتا چار ستوین ل دهۆكێ، بەنداڤا جەروانە ل شێخان، كەلهێن ئاكرێ و هەولێرێ) ئەنجامدایە و ب رێكا ڤی بەرنامەی دەلیڤەیێن كاری بۆ پتری ٦٦ هزار پەنابەرێن سووری و خوەجهێن پارێزگەهێن دهۆك و هەولێرێ پەیداكرینە.
