جهێن شوونواری ل زاخۆ دهێنە نووژەنكرن
زاخۆ، عەلی حاجی:
رێڤەبەرێ شوونواران ل زاخۆ بۆ رۆژنامەیا ئەڤرۆ دیار كر، پشتی نووژەنكرنا بازارێ كەڤنێ زاخۆ، د نوكە دا ئێكەمین قوتابخانەیا زاخۆ ل گەل قشلا زاخۆ دهێنە نووژەنكرن.
محەمەد ئەحمەد، رێڤەبەرێ شوونواران ل زاخۆ گۆت: «پشتی نووژەنكرنا بازارێ كەڤنێ زاخۆ ژ بازارەكێ گەفا ژناڤچوونێ ل سەر بۆ ئێك ژ بازارێن گەشتیاری و جوان، د نوكە دا كار د نووژەنكرنا قشلا زاخۆ و ئێكەمین قوتابخانەیا زاخۆ یا ب ناڤێ ئەحداسا دهێتە كرن و زێدەتری 85% كارێ نووژەنكرنا وێ ب دووماهی هاتیە، هەر ل گەل نووژەنكرنا وێ ژی پرا ب ناڤودەنگ و مێژوویی یا ب ناڤێ پرا شەهابی ژی دهێتە نووژەنكرن، پشتی ژ ئەگەرێ باران و دروستبوونا لەهیان پشكەكا وێ هەرفتی، د نوكە دا پارچا مایی ژ وێ پرێ ڤەدگەرت بۆ روویێ راستەقینەیێ وێ پرێ، دەما بۆ جارا ئێكێ هاتیە دروستكرن و دێ هەر ل سەر شێوازێ وێ یێ كەڤن ژی نووژەن كەین و ئێدی نابیت ب چ ڕەنگان تڕۆمبێل هاتنوچوونێ ل سەر بكەن، ب تنێ بۆ هاتنوچوونا پێیان دێ هێتە ب كارئینان و كارێ نووژەنكرنا وێ بەردەوامە و د دەمەكێ نێزیك دا دی ب دووماهی ئینین».
ناڤبری گۆتژی: «ئەم دخوازین ب نووژەنكرنا وان جهێن شوونواری دەڤەرەكا دروست یا شوونواری و گەشتیاری دروست بكەین د ناڤ سەنتەرێ بازاڕێ زاخۆ دا و ب دووماهی هاتنا وان پڕۆژەیان ژی دێ كەرتێ گەشتیاری ل زاخۆ ڤەژەنەكا باش ب خوەڤە بینیت».
