زانكۆیێن زاخۆ و سۆران دێ سەمپۆزیۆما ئاسایشا خوارنێ ئەنجامدەن
زاخۆ، دلۆڤان هالۆ:
دكتۆر جاسم محەمەد عەبدۆ، هاریكارێ سەرۆكێ زانكۆیا زاخۆ بۆ ڕۆژناما ئەڤرۆ دیار كر كو زانكۆیا زاخۆ و زانكۆیا سۆران ب هەڤكاری ل گەل ئیدارەیا سەربخوە یا زاخۆ، سوبەهی 5/6/2024 دێ ڕابن ب ئەنجامدانا سەمپۆزیۆمەكا تایبەت ب ئاسایشا خوارنێ ڤە ل هەرێما كوردستانێ، ل دەمژمێر 10ی سپێدێ ل هۆلا خەلیل خەیالی ل كۆلیژا زانستێن مرۆڤایەتی یا سەر ب زانكۆیا زاخۆ ڤە.
هاریكارێ سەرۆكێ زانكۆیا زاخۆ، ئاماژە ب وێ چەندێ ژی كر كو بابەتێ پەنەلێ سەرەكی یێ سەمپۆزیۆمێ ل ژێر ناڤونیشانێ (كوالێتیا بەرهەمێن ناڤخۆیی و كارتێكرنا وێ ل سەر ئاسایشا خوارنێ)یە، كو ژ چەندین بابەتان پێك دهێت، وەكو: پلان و ستڕاتیژیەتا حوكمەتا هەرێمێ بۆ بلندكرنا بەرهەمێن خوارنێ دێ ژ لایێ بەرپرسێ گشتی یێ پلاندانانێ ل وەزارەتا چاندنێ دكتۆر زیدا محەمەد ڤە هێتە پێشكێشكرن، پیڤەرێن دلنیایا جۆری یا ناڤخۆیی و دەرەكی ژ لایێ هاریكارێ سەرۆكێ زانكۆیا زاخۆ ڤە دێ هێتە پێشكێشكرن، دیسا شرۆڤەكرن و چاوانیا خوارنێ ل هەرێما كوردستانێ دێ ژ لایێ ڕاوێژكارێ وەزارەتا دارایی و ئابووری دكتۆر دارا محەمەد ڤە هێتە پێشكێشكرن، گرنگیا تەكنیكێن نوو بۆ دروستكرن و كوالێتیا خوارنێ دێ ژ لایێ مامۆستایێ زانكۆیا سەلاحەددین دكتۆر نەبیل حسێن ڤە هێتە پێشكێشكرن، ڕێڤەبەرێ پەنەلی ژی دكتۆر هەڤال عەبدوللا یە ژ زانكۆیا سۆڕان.
دكتۆر جاسم گۆت: «برگەك ژ ئەڤێ سەمپۆزیۆمێ فەستیڤالەكا دو ڕۆژی یە بۆ بەرهەمێن خومالی دێ ل ڕێكەڤتی 5 و 6/6/2024 ل دەمژمێر ٦ی ئێڤاری ل كۆڕنیشێ پرا دەلال هێتە ئەنجامدان و تێدا چەندین بەرهەمێن خوارنێ یێن خۆمالی دێ هێنە نیشادان».
