حوكمەتا هەرێمێ خزمەتێن چارەسەریا پەنجەشێرێ بێ بەرامبەر بۆ زارۆكان دابین دكەت
دهۆك، لەزگین جۆقی:
بەرپرسێ سەنتەرێ ژین یێ نەخۆشیێن خوینێ و پەنجەشێرا زارۆكان ل ساخلەمیا دهۆكێ دیار كر، 20 زارۆكێن نەخۆش یێن پەنجەشێرا زارۆكان ژ لایێ حوكمەتا هەرێما كوردستانێ ڤە بۆ دەرڤەی وەلاتی هاتینە هنارتن بۆ چاندنا مەژیێ هەستی و هەمی خزمەتێن نۆشداری و چارەسەریێ بێ بەرامبەر بۆ زارۆكێن نەخۆشیا پەنجەشێری ژ لایێ حوكمەتا هەرێما كوردستانێ ڤە دهێنە دابینكرن .
د. حەسەن عەبدوللا، بەرپرسێ سەنتەرێ ژین یێ نەخۆشیێن خوینێ و پەنجەشێرا زارۆكان ل ساخلەمیا دهۆكێ بۆ ئەڤرۆ گۆت: «ل دهۆكێ 444 زارۆك تووشی نەخۆشیا پەنجەشێرێ بووینە و هەر سال 50 هەتا 60 حالەتێن نوو دهێنە تۆماركرن، هەتا نوكە 286 زارۆك ژ نەحۆشیا پەنجەشێرێ قورتالبووینە یێن هاتینە چارەسەركرن و 20 زارۆكێن نەخۆش ژی ژ لایێ حوكمەتا هەرێما كوردستانێ ڤە بۆ دەرڤەی وەلاتی هاتینە هنارتن بۆ چاندنا مەژیێ هەستی و بەهرا پتریا وان چارەسەربوونە».
گۆتژی: «نوكە 97 زارۆكێن نەخۆش چارەسەریێ ل سەنتەرێ ژین یێ نەخۆشیا خوینێ و پەنجەشێرا زارۆكان وەردگرن و هەمی خزمەتێن نۆشداری و چارەسەریێ بێ بەرامبەر بۆ زارۆكێن نەخۆشیا پەنجەشێرێ ژ لایێ حوكمەتا هەرێما كوردستانێ ڤە دهێنە دابینكرن».
