تو ب تنێ
عەدنان رێكانی
ڤێ ئێڤارێ
دێ تە ل كیڤە بینم؟
هەمی تشت لبەر من بەرزە بوون،
هەتا نڤیسینێن تە ژی..
شەڤێن درێژ هەڤڕكیا
لێدانێن دلێ من دكەن
تو ل كیڤەیی..؟
من دڤێت پالێ خوە بدەمە
دیوارێ خووشەیان..
و خوە ل سەر گۆپالێ
ئەڤینا تە بگرم،
دەمێ كەفتن و شەكەستنا
شینوارێن خوە هەمبێز دكەین
بكەینە هەلبەست
بكەینە رۆمان و چیرۆك
وەك سترانەكا ئەڤینداێن نیڤا شەڤێ
وەر پەردا گوهێن من تژی بكە،
ڕازیبوونا بیرهاتنان..
ل سەر بەلگێن شەرمینۆكا
هێشتا چاڤەرێی وێ هاتنێ نە،
و ئەز هێشتا وەكی خوە مە.. نەهاتیمە گوهۆڕین
هێشتا ئەز وەك وێ سۆزێ مە
یا تە دایە من..
ناڤێ تە دنڤیسم..
داكو من هۆزانەك هەبیت،
هەمی پیڤەر و روخسارێن جوانیا
فەرهەنگێن زمانی دەباز بكەت
ئەڤجا دێ تە ل كیرێ بینم
تو بتنێ چیرۆكا ئێڤارا منی
