حەزكرنەك باسكۆكری
بەشیرا دەروێش/ قامشلۆ
د تەنوورا دلێ خوەدە
ئەزێ حەزكرنا خوە ژ تەڕە
ب نانەكی كونجیكری ب پژینم
ل بەر سینگێ هەژاران
د كۆلانێن وەلاتێ سار و سەقەمی
دە بەلاڤ بكم
ل كەنارێ هەموو رێیان
ل كەنارێ هەموو رێیان دە راخینم
دا كو بووك گەنمێن زەر بچرسن
بهنا مەهێن هاڤینی ژێ بفوورن
ل سەر دێمێن چلمسی
و مژ و مۆرانا دلێ شكەستی
ژ هەڤ بەلاڤ بكە و بكەلینە
هەگەر جارەكێ دووری تە بم
یانژی مرم!
ژبیر نەكە
ژ بێهنا ئاخا شل و
ب بارینا چپ چپا بارانێ رە
پر حەزدكم
ب رۆژێ رە گۆڤەندا ئازادیێ دگێرم
دەما تو ل بیرا من بی
هەر تشت ب من خوەشە
هەرە
هەرە نە سەكنە
دەستێ خوە
بدە بەر تیرۆژكێن رۆژێ
دوارگەها ئەلندێ دە ماچ بكە
بانگ بكە
قیر بكە
بێژە
بێژە ئەزێ دەنگێ تە ببهیسم
كو د گۆرێ ژی دەبم
ئەزێ ببهیسم
ئەڤین نە پەردەكە خاڤە
د ناڤبەرا من و تە دە
بێژە من!
ئەز ل ڤرم
بێژە ئەز هەمە
ب هەموو بیر ئانینێ تە
ب بێهنا كەزیێن تەرە ژیان دكم
پەلێ شەڤێن هەلبەستێ
ب تێلێن دلێ من ڤە نە
نایێن برین
د ناڤا خێزكێ هوورێ گولیێن
پەیڤێن تە دە دژیم
ئەزێ ببهیسم
و دەنگێ دلێ تە بكم
بێژە ئەز ل ڤرم
دێ بمینم
هەر و هەر
ژ تە حەزدكم