ل خوەگەڕیان
خالد عەلی سلێڤانەیی
ب كنجرەكێ رۆناهییێ
بەرچاڤكێن هزرێن خوە پاقژ بكە
وتژی بەرملێن خوە تەرمێن ئەنیگرێكرنا خوە بكە
ل هنداڤ سەهما خەما خوە یا مەزن ژۆردا بەردە و
بگڕنژە و پاشی قیرییەكێ ڤەدە
دلێن ڤان ئەورێن پەییزێ پێ بشەوتن
كو تاڤییەك ژ بەربچت
هندەك ژ هشكەسالییا تەمەنێ تە یێ مایی بڤەژینت ڤە..
:: :: ::
ب شووشەكا تاری
برسقینا كێلبێن
بەرەڤاژ بكە
و دناڤ گەشتەكا چ سەختە چ نیڤراست
(ئمئم)ەكێ دگەل خوە بكە و نفرینەكا ب قەبارێ تۆرەبوونا خۆ
ل ئادگارێن رەوشێن نە ل بار بوەشینە.
:: :: ::
ب (خوە) یەكی دی
ل بەژنا تەمەنێ دەبازبووی بنێرە
و بزانە تە چەند بهار وئادار و گەهشت و سەیران
گۆری (خوە)یەكێ دی یێ ئاشۆپ كرن.
ما تو چەند (خوە) یی
و هەتا گەنگی دێ ل (خوە)یێ راستەقینە گەڕی؟!
نێ قامچیێن دەمی دگەل قلۆزبوونا هێزێ
دناڤ گێلەشۆكا تە دەروونێ خوە تێچكلاندی
ئەو دەرفەتا پێدڤی بۆ تە نەهێلایە
