دو چیڕۆكێن گەلەك كورت
شەمال ئاكرەیی
ئەنتەرنێت
هەر هاڤین، ژ بۆ بۆراندنا بێهنڤەدانا خواندنێ دزڤڕی گوندێ خۆ یێ دویرەدەست و د ناڤ چیایان دا، كو چ تاوەرێن تەلەفۆنێ و كێبڵێن نێتێ لی نەبوون.. گوند، هەكو دبێژن، مینا مێرگەكا بەهەشتی بوو. سالێن زارۆكینیێ و سنێلەیێ بۆ وێ دبوونە گرتەیێن فلاشباك و گڕنژین ل سەر لێڤێن وێ نیگار دكرن و مەژیێ وێ ژ گڤاشتنێن وانە و ئەزموونان ئارام دبوو. ل هندەك هاڤینان، گورزەكێ كتێبان ل گەل خۆ دبر و هەمی دخواندن. بەلێ ل ڤێ هاڤینێ ب تنێ بۆ دو رۆژان ل گوندی ما و بیهنا وێ هاتە سەری دفنا وێ، چونكی نە كتێبان و نە نۆستالژیایێ، شییان جهێ ئەنتەرنێت و سوشیال میدیایێ بگرن پشتی ل سەر راهاتی و پێ ئالۆدەبوویی!
پەییسك
هەژار زێدەباری، كو خودی باوەڕنامەیەكا بلند یا زانستی بوو، نڤیسەرەكێ گەلەك بەهرەمەند و ب شییان بوو، پترییا نڤیسەر و یێن بناڤ هنڤیسەرێن باژێڕێ وی، مشورەتا وی دكرن و ژ لێزانی و لێهاتییا وی د مفادار بوون.
هەژارێ نڤیسەر، كو گەلەك یێ مەلەڤان بوو د هونەری نڤیسین و داهێنانێ دا، مینا ناڤێ خۆ بوو، د هونەرێ دروستكرنا هەڤبەندییان دا ل گەل بەرپرسان یێ هەژار بوو؛ چونكی یێ دویر بوو ژ دوروییاتی و ئەزمانلویسیێ. لەوڕا نڤیسەرۆكێن، كو كێر نە دهاتن ببنە شاگردێن وی ژی، بوونە خودان كورسیكێن رێڤەبەرییان و ترومبێلێن بلند؛ لێ ئەو هەر ما مشورەتكارێ وان كەسێن شییان و ملێن وی دكرنە پەییسك و پێ بلند دبوون
