پرسیار و بەرسڤ
سەباح بەیتوللا
پرسیارا دیرۆكێ بكەن و بێژنێ: تە كی سەركردە د ناڤ بەرپەرێن خۆ دا ب سەربلندی تۆماركریە؟
ـ پرسیارا دەرگەهێن زیندانێ و شفشێن ئاسنی بكەن و بێژنێ: كی سەركردە بوویە كو د ژیێ سێ سالیێ دا د زیندانێ دا شیر ڤەخواری و هی بوویە پەیڤێن سەرهەلدانێ و بەرخۆدانێ و فیداكاریێ؟
پرسیارا پەیڤێن فیداكاریێ و دلسۆزیێ و خۆگوریكرنێ و خەبات و رزگاریێ و سەرفیرازیێ و سەربەستیێ بكەن و بێژنێ: كی سەركردە دگەل هەوە هەڤال و هەڤچەپەر بوویە؟
ـ پرسیارا سەرۆكانیا كوردایەتیێ بكەن و بێژنێ: كی سەركردەی پتر قەستا تە كریە و داخوازا هەمبێزكرنا رۆژا سەربەستیێ كریە ؟
_ پرسیارا چیایێن كوردستانا مەزن بكەن و بێژنێ: كی سەركردەی پتر چەپەرێن سەرهەڵدانێ و بەرخۆدانێ ل سەر سینگێ تە لێ داینە و گۆتیە دوژمن و داگیركەرا كوردستانێ دێ بۆ هەوە كەینە گۆرستان؟
ـ پرسیارا چەكێ شەرەف و كەرامەتێ بكەن و بێژنێ: تو پتر ب ملێ چ رێبەر و قەهرەمانەكی ڤەبووی؟
– پرسیارا فەرهەنگا ئاوارەیی و دەربەدەریێ بكەن و بێژنێ: تو ل دگەل كی سەركردەیی دۆست و هەڤال بوویی؟
– پرسیارا پێشەوا قازی بكەن و بێژنێ: ئالایێ پیرۆزێ كوردستانێ تە دایە دەستێ كی سەركردەیی هەتا كو بلند و بلند رابگریت؟
-پرسیارا بارزان و مهاباد و هەولێر و دێرسمێ و قامشلۆ و ئامەد و سلێمانیێ و دهۆكێ و كەركووكێ و هەمی باژێر و باژێركێن كوردستانێ بكەن و بێژنێ: كی سەركردەیە؟ پتر سلاڤ ل هەوە كریە و ئاخا پیرۆزا هەوە ژ دل پەرستی یە و قوربانی دایە بۆ سەربەستی یا هەوە و بەرەڤانی ژێ كریە و بۆ وێ ئاخێ بەرخوەدان كریە؟
– پرسیارا هەژار و بەلەنگازا بكەن و بێژنێ: ئەرێ كی بوو هەلگرێ بارێ خەمێن هەوە؟
-پرسیارا هۆزان و ئاوازێن شۆرەشگێریێ و فیداكاریێ و دلسۆزیێ بكەن و بێژنێ: جهێ كی رێبەر و سەركردەی د ناڤ پەیڤێن هەوە دایە؟
-پرسیارا ئازادیێ و ئاشتیێ و دیموكراسیێ بكەن و بێژنێ: ئەرێ هوین پتر دگەل كی سەركردەیی دا بووینە و ژ دل ڤیاینە؟
– پرسیارا پێلێن رویبارێ (ئاراس) ی بكەن و بێژنێ: كی سەركردەیی دناڤ پێلێن تەدا دگەل (٥٠٠) قەهرەمانا مەلەڤانی كرینە و دەرباز بوویە و گۆتیە دونیایێ (یان كوردستان یان نەمان) ؟
ـ پرسیارا دیرۆكا مرۆڤایەتیێ بكەن و بێژنێ: كی سەركردە چ جارا تەسلیمی ئیرادا دوژمن و داگیركەران نەبوویە و د فەرهەنگا وی دا خۆچەماندن تێدا نەبووی؟
-پرسیارا دوژمنی بكەن و بێژنێ: تە ترس و سەهم پتر ژ كی رێبەر و سەرۆكی كریە؟
-پرسیارا ئاوارە و كەس و كارێن شەهید و پێشمەرگەهێن قەهرەمان و زیندانیێن سیاسی بكەن و بێژنێ: هوین پتر ئاشق و ئەڤیندارێن كی سەركردە و رێبەری بووینە؟
-پرسیارا هەمی رێبەر و زانا و بلیمەت و شورەشگێر و خەباتكاران بكەن و بێژنێ: هوین شانازیێ ب ناڤێ كی رێبەری دكەن؟
-پرسیارا ئەسمانێ سەربلندیێ و داڤێن رۆژا ئازادیێ و سەربەستیێ بكەن و بێژنێ: هوین كی سەركردەیی پتر د باوەشا مەزنا خۆدا دگرن؟
-پرسیارا هەلبەستڤان محەمەد جەواهیری بكەن و بێژنی:
بالمصطفى، عنوان نهضة أمة
يوم التخاصم بإسمه يُقسّمُ
، تۆ دگەل كێ بوو؟
-پرسیارا هەژارێ موكریانی بكەن و بێژنێ: كانیكێن هۆزانێن تە دگەل چ ناڤەكی خەمل و جوانیا خۆ دكەن، تو دگەل كێ بووی كو تە دگۆت:
من دەزانم تۆ نامری…………تۆ لە مردن بەهێزتری
-پرسیارا دونیایێ بكەن و بێژنێ: ئەرێ ئەو كی سەركردەیە مەلبەندەك ل دونیایێ بۆ بەرەڤانیێ ل میللەتێن مەزلوم بناڤێ وی هاتیە دامەزراندن و میللەت شانازیێ پێڤە دكەن؟
-پرسیارا هەمی سەركردە و رێبەر و خەباتكارێن میللەتێن ئازادیخواز و ئاشتیخواز بكەن و بێژنێ هوین بۆ مەزناتیا خۆ كی سەركردەیی هەلدبژێرن؟
ئەڤە هەمی دێ كۆم بن و ب ئێك دەنگ بێژن :
مستەفا بارزانی ….. بارزانی مستەفا.
