هەستێن مری
عەبدولرەحمان مەحموود
ل بن وێ دارا سیبەرا وێ
ژ ڕەنگێ بهارا خوە کەتی
ئەوان چەقێن لێ هشکبووی
ئەوان بەلگێن زەر و پێتی و ڤەوەریای
حالێ پیرا ب سەرداهاتی
سەر و سیما لێ قورمچین و
ژیێ گەنجاتیێ سەر لێ خوار و
پوسیدە مای
بەرووکێ خەما ژێگرتی
پاییزا وێ ڤەڕێژەکە
دگەل هەستێن من ئاوێتە دبن، تێکەل دبن
جار ئەڤ هەستە
دبنە ڕۆندک، دلۆپ دلۆپ
ڕهێن دارێ
ژان و حەیف و برینێن ئەڤی جانی
هەمی پێکڤە تێکوەردبن
بەرە بەرە دلێ شکەستی
ڕێڤنگەکێ بێ چەنگ و مل
بەرەف چول و بیابانا مشەخت کرم
هێدی هێدی هەستێن گەرم
هێشتا ل نیڤا ڕێ
ئەو یێ دمرن
دیرۆک و سال و زەمانە
هیڤیێن مە چوونە بای و
بەرەف ئەسمانا یێن دفڕن
