عەشقەكا ئەزەلی
سەیفوللا محەمەد
دەمێ ڤێ جارێ بەرەف تەڤە دهێم، دێ چیڕۆكا عەشقەكا ئەزەلی بۆ تە خوینم، نێ تو دزانی ژڤانێن مە نە یێن ژبیركرنێنە، نێ تو دزانی د هەمبێزا تەدا، ژیانەك ڤەدەر ژ ڤێ ژیانا نە ڕۆژ ڕۆژ و نە شەڤ شەڤ د بینم، من بهێلە دڤێ ڕەوشێدا، بێ دەنگ بمینە، بێدەنگییا تە دلێ من ئارام دكت، هەست ب پێژنا هیڤییێن كویڤی یێ سالێن دەربازبووی دكەم.
چ ئاوڕان ل من نە ڤەدە و نە بێژە حەزژ تە دكەم، بلا بێ دەنگ بین، نە تو بەحسێ دلێ خوە بكە و نە ئەز چ چیرۆك و چیڤانۆكا بۆ تە دبێژم. من نەڤێتن مەم و زینا بۆ تە ڤەگێڕم، من نەڤێتن ببی زینەك بێ مراد و بەكویەك هیڤییێن مە داعویرت، نە ژی ببمە سیابەندێ سلیڤی و نە ژی قەیسێ دینێ لەیلایێ و نە چ ژ ڤان عاشقێن د تراژیدییا عەشقا خوەدا خەندقین و خەلكەك ژ دلپێڤەهیڤە خۆشییێ ژ چیڕۆكێن وان ب بینن. بلا نەبین ئەو چیڕۆك و سەرهاتی.
من دڤێتن د عەشقێدا خوەڕاگر بی وەكو چیا، ب هێز و بلند بی، داكو د بەرێخوەدانا تەدا هەر سەر بلند بم، دەمارێن د لەشێ تەدا ببنە ڕویبار و چەندەكێ تێهنا من یا عەشقێ بشكێنیت، سینگێ تە ب بیت دەشتەكا پان، تۆڤێ ژیانێ لێ بچینم، ببی وار و وەلات، ببی ئەو عەشقا ئەزەلی یا من ژێ گۆتی و هەر ژێ د بێژم.
