باسكێت بۆلا زاخۆ سه‌ركه‌فتنا دویێ ب ده‌ستڤه ئینا
عەلی حاجی:
تیما باسكێت بۆلا یانه‌یا زاخۆ به‌رده‌وامی دا ئه‌نجامێن خوه یێن باش و شیا سه‌ركه‌فتنا دویێ ب ده‌ستڤه بینت و ب جووداهییا 23 خالان پشتی ب سه‌ركه‌فتنی ل سه‌ر مێڤانا خوه یانه‌یا غاز ئه‌لشیمال ب90 به‌رانبه‌ر 67 خالان، د یارییا واندا ئه‌وا ژ چارچووڤه‌یێ گه‌ڕا چارێ یا خولا پیشه‌كارێن ئیراقێ دا ل هۆلا گرتییا بنگه‌هێ وه‌رزش و لاوان ل باژێرێ زاخۆ هاتییه كرن.
ل دۆر ڤێ سه‌ركه‌فتنێ ئەندامێ دەستەیا کارگێریا یانەیا زاخۆ یا وەرزشی بۆ رۆژنامەیا ئەڤرۆ ڕاگەهاند تیما وان یا باسکێت بۆلێ کەڤتیە ل سەر ڕێیا دروست و ئێدی ئاست و ئەنجامێن وان دێ گوهۆڕین ب سەر دا هێن.
زێدەتر دلژار عەدنان گۆت: د یاریێن بوری دا مە تێبینی ل سەر ئاست و ئەنجامێن تیما مە یا باسکێت بۆلێ ئەوا پشکدار د خولا پێشەکارێن ئیراقێ دا هەبوون ژبەر کو ئەو ئاست و ئەنجامێن دەستەیا کارگێریێ ژ وان چاڤەرێ دکر نە دهاتە دیتن، ژبەر هندێ مە ژ نێزیک ڤە دۆفچوونا تیمێ کر و مە شیا خالا لاواز ببینن و هەر زوو چارەسەر کر و کاریگەریا وی کاری ژی د یاریا بەرامبەر غاز الشمال دا دیار بوو و ب ئاست و ئەنجام تیما مە شیا سەرکەڤتنا دویێ تومار بکەت و هەتا جەماوەری ب خوە ژی هەست ب گوهۆڕینان دکر دناڤ تیما مە دا، د یاریێن بهێت دا ئەم ل وێ باوەرێنە دێ ئاست و ئەنجامێن تیما مە گەلەک باش بن و دێ بەر ب رێزێن پێشیێ ڤە چیت.
ناڤبری گۆت ژی: هەر دیسان مە یاریزانێ خوە یێ وەرزێ بوری ئیساک دووبارە ڤەگەراندە دناڤ تیمێ دا و پێدڤی ب شیانێن وی هەبوون و ئەو یاریزانە دێ پتر هاریکاریا تیما كه‌ت.
