یانەیێن كوردستانی دێ بزاڤێ كەن مفایی ژ راوەستیانا خولێ وەربگرن
قەیس وەیس:
فدراسیۆنا فوتبۆلا ئیراقێ بڕیاردا هەڤڕكیێن خولا ئیراقێ بهێنە ڕاوەستاندن هەتا 26ێ ڤێ مەهێ كو دبیتە ڕاوەستیانا نێڤدەولەتی، پێخەمەت بەرهەڤیێن هەلبژارتیێ ئیراقێ بۆ هەردو یاریێن بەرانبەر هەلبژارتیێن فلەستین و كوریا باشۆر ژ چارچووڤەیێ ڤاڤارتنێن مۆندیالا جیهانی 2026ێ.
غالب ئەلزاملی ئەندامێ فدراسیۆنا ناڤهاتی بۆ دەزگەهێن رۆژنامەڤانی گۆت: ل دووڤ سیستەمێ نێڤدەولەتی بڕیارە یاریێن گەڕا چارێ ژ خولا ستێرێن ئیراقێ بهێتە ڕاوەستاند پشتی ب دووماهی هاتنا گەڕا سێیێ ئەوا بڕیارە هەر ژ شەشێ چریا ئێكێ یا بهێت دەستپێبكەت كو ئەڤ ڕاوەستاندە ل دووڤ سیستەمێ رۆژێن فیفایێ نە ل سەر ئاستێ جیهانێ، هەروەسان هەلبژارتیێ ئیراقێ دێ دو یاریێن خوە ژ ڤاڤارتنێن مۆندیالا جیهانی 2026ێ بەرانبەر هەر ئێك ژ فلەستن و كوریا باشۆر كەت، ئەوا دهێتە چاڤەڕێ كرن ئەڤ ڕاوەستاینە بۆ ماوەیێ 20 رۆژان بەردەوام بیت.
هەروەسان ناڤهاتی گۆت: هەلبژارتیێ ئیراقێ دێ یارییا خوە یا ئێكێ ل 10ێ مەها بهێت مێڤاندارییا فلەستین كەت، یارییا دویێ ل 15ێ هەمان مەهـ دێ ل پایتەختێ كوریا باشۆر سییول بیتە مێڤانا خودانێن ئەردی، لەوما ژی خولا ستێرێن ئیراقێ پشتی ب دووماهی هاتنا گەڕا سێیێ ئەوا دێ سوبەهی دەستپێكەت و گەڕا چارێ بۆ 26ێ ڤێ مەهێ هاتە پاشئێخستن.
هەر چار یانەیێن كوردستانی دهۆك، زاخۆ، هەولێر و نەورۆز دێ بزاڤێ كەن پێخەمەت مفایی ژ ڤێ ڕاوەستیانێ وەربگرن ب دانانا پلانێن نوو د ماوەیێ د ناڤا راهێنانێن خوە دا، دهێتە پێشبینیكرن یانەیێن ناڤەڕاست و باشۆرێ ئیراقێ بۆ ماوەیێ حەفتیەكێ كەمپێن خوە ل هەرێما كوردستانێ ب دانن و ئەڤچەندە دێ بیتە دەلیڤە بۆ یانەیێن كوردستانێ ژبۆ ئەنجامدانا چەند یاریێن هەڤالینی پێخەمەت بێزاری دناڤ رێزێن تیما واندا پەیدا نەبیت هەروەسان راهێنەر ئەوان كێماسیان چارەسەربكەت،.
بۆ زانین یانەیا دهۆك د دویاریێن دەستپێكی دا تووشی خوسارەتیێ بوو بەرانبەر یانەیێن زەورا و هەولێر لێ دیارییا ئێكشەمبییا بۆری دا سەركەفتنەكا گرنگ ل سەر نەجەف ئینا ب گۆلەكێ بێ بەرانبەر، ژلایێ خوەڤە یانەیا زاخۆ دو وەكهەڤ دگەل یانەیێن تەلەبە و نەورۆز ئیناینە و د یارییا سێیێ دا سەركەفتنەكا مەزن ل سەر مێڤانا خوە یانەیا كەربەلا ب پێنج گۆلان بێ بەرانبەر ئینا.
