ئیراقێ رێنمایێن خولێ دانان و گارە خوە ڤەكێشا
فدراسیۆنا باسكێت بۆلا ئیراقێ رێنما بۆ وەرزێ نوو یا خولا پلا ئێك دانان ئەوا بڕیارە هەڤڕكیێن وێ ل دەستپێكا كانوونا ئێكێ یا بهێت بهێنە ئەنجامدان، یانەیا گارە ب فەرمی خوەڤەكێشانا خوە ڕاگەهاند.
د. خالد نەجم جێگرێ سەرۆكێ فدراسیۆنا باسكێت بۆلا ئیراقێ دیار كر بۆ وەرزێ نوو 2024-2025 بڕیار هاتیە دان شێوازێ خولا پلا ئێك بۆ چار كۆمان ل چار دەڤەران هێنە بەلاڤكرن، هەر كۆمەكێ دێ دو یانە دەربازنە قۆناغا دویێ كو دێ بیتە قوناغا خول هاتن و چوون ئەوا بڕیارە هەڤڕكیێن خولێ ل دەستپێكا كانوونا دویێ بهێتە كرن، دووماهی دەلیڤە بۆ پشكدارییا یانەیا هەتا 20ێ ڤێ مەهێ یە.
ل دۆر تیما یانەیا گارە و ئەگەرێن خوەڤەكێشانا وێ شێروان بەشار سەرۆكێ یانەیێ بۆ رۆژنامەیا ئەڤرۆ گۆت: هەرچەندە تیما مە زێدەتری دو هەیڤ بوون بەرهەڤیێن خوە ب شێوەكێ رێكخستن ب سەرپەرشتیا راهێنەر خەتاب عومەر و هەموو یاریزانێن مە یێن پارێزگەهێ بوون د ژیێ گەنجاتی و یاریزانێن خودان سەربۆر، سەرباری بزاڤێن مە یێن بەردەوام ژبۆ پشتەڤانییا تیما مە بهێتە كرن، لێ چو پشتەڤانی نەبوون، راهێنەر و یاریزانێن مە پێدڤی ب داهاتەكی نە وەكو مووچە، پێدڤی ب ترۆمبێلەكا هاتنووچوون پاس ژبۆ گەهاندنا وان بۆ جهێ راهێنانێ و پشكدار د قارەمانیێ دا دەمێ یاری ژ دەرڤەیی باژێرێ دهۆكێ بن، لێ چو بۆ تیما مە نە هاتە كرن و ئەم نەچاربووین دگەل كادرێ راهێنانێ كۆمبین و بڕیارا خوە ڤەكێشانێ بدەین و تیما مە بهێتە هەلوەشاندن.
هەروەسان ناڤهاتی گۆت: هیڤییا مە ژ جهێن پەیوەندار ئەوە كو پشتەڤانییا گەنجێن باژێرێ دهۆكێ بكەن ژبەركو یانەیا گارە كۆمەكا مەزن یا یاریزانان ب خوەڤە دگریت.