زاخۆ رژدە حەشدا شەعبی ب ڕاوەستینت
ئەڤرۆ ل هۆلا گرتییا شەعب ل پایتەختێ ئیراقێ بەغدا تیما یانەیا زاخۆ ب ژڤانە بۆ ئەنجامدانا دو یاریێن گرنگ و ب هێز ژ چارچووڤەیێ گەڕا شەشێ یا خولا باسكێت بۆلا ئیراقێ بۆ یانەیێن پشەكاران، دەمێ هەردو تیمێن وێ ل سەر ئاستێ تازەپێگەهشتییان و پێشكەفتیان دبنە مێڤانێن هەردو تیمێن یانەیا حەشد ئەلشەعبی، د تاقیكرنەكا دی یا نوو دا بۆ كوڕێن خابووری.
ل سەر ئاستێ تازەپێگەهشتییان تیما زاخۆ دێ دەمژمێر دویێ پشتی نیڤرۆ ل هۆلا گرتییا شەعب ل بەغدا پایتەختێ ئیراقێ بنە مێڤانێن تازەپێگەهشتیێن حەشد ئەلشەعبی، نڤشێ نوو یێ تیما زاخۆ د پێنج یاریێن بۆری دا سێ سەركەفتن ل سەر تازەپێگەهشتیێن ئەلتیجارە 65-35 خالان، بەرانبەر غاز ئەلشیمال 71-60 خالان و سەركەفتنا سێیێ دەربەندیخان ب 60-49 خالان بوو، لێ دگەل شورتە 32-67 خالان و دگەل كەرخ ب49-69 خالان تووشی خوسارەتیێ بووی، بۆ ڤێ یاریێ دێ بزاڤێن سەركەفتنا چارێ كەت.
ژلایێ خوەڤە ل سەر ئاستێ پێشكەفتییان بۆ یانەیێن پیشەكار تیما یانەیا زاخۆ ب سەركێشیا راهێنەرێ سربی تیهیۆمێر بادنگێر ژی چاڤ ل سەركەفتنا چارێ یە دەمێ دەمژمێر پێنجی ئێڤاری ل هەمان هۆلێ دبیتە مێڤانا یانەیا حەشد ئەلشەعبی د یارییەكا بهێز دا، كوڕێن خابووری بەرانبەر تاقیكرنەكا بهێزە ئەوێن د پێنج یاریێن بوری دا سێ سەركەفتن بەرانبەر دەربەندیخان 124-82 خالان، بەرانبەر غاز ئەلشیمال 90-47 خالان و بەرانبەر ئەلتیجارە 96- 89 خالان، لێ دگەل هەر ئێك شورتە ب59-91 خالان و كەرخ 90-103 خالان تووشی خوسارەتیێ بوویە.
