گۆلپارێزەكێ یانەیا پیرس د ناڤ رێزێن هەلبژارتیێ ئیراقێ دایە
قەیس وەیس:
گۆلپارێزێ تیما یانەیا پیرس ئەلند ئەنوەر ئێك ژ ئەوان یاریزانێن ژلایێ راهێنەر ئەحمەد كازمی ڤە هاتییە داخوازكرن بۆ ناڤ رێزێن هەلبژارتیێ ئیراقێ یێ فوتبۆلێ دا خوە بەرهەڤكرن بۆ یارییا ئەڤرۆ ژ چارچووڤەیێ ڤاڤارتنێن كێشوەرێ ئاسیا بۆ كۆپا 2025 ل بن ژیێ 17 سالی دا، ئەوا بڕیارە هەڤڕكیێن وێ سالا بهێت وەلاتێ سعۆدیێ مێڤاندارییا وێ بكەت.
ئەلند ئەنوەر ئێك ژ گۆلپارێزێن ئەكادیمییا یانەیا پیرس ل باژێرێ دهۆكێ یە، پشتی د تاقیكرنێن ڤەبڕ ژبۆ ژێگرتنا باشترین گۆلپارێزان ب سەركەفتی شیا جهێ خوە دناڤ رێزێن هەلبژارتیێ ئیراقێ بكەت و ببیتە جهێ باوەریێ بۆ راهێنەرێ هەلبژارتیێ ئیراقێ.
د داخویانیەكێ دا فیراس بەحر ئەلعلوم ئەندامێ فدراسیۆنا فوتبۆلا ئیراقێ بۆ دەزگەهێن رۆژنامەڤانی دیار كر هەلبژارتیێ مە ل سەر ئاستێ تازەپێگەهشتییا بۆ ماوەیێ دو حەفتییان ل وەلاتێ چینێ د كەمپەكێ راهێنانێ دا بوو خوە بەرهەڤكرن بۆ یارییا ئەڤرۆ ژ چارچووڤەیێ ڤاڤارتنێن كۆما پێنجێ دا ئەوا پێكهاتییە ژ ئۆزپاكستان، فلەستین، تایوان، ئەوا 40 هەلبژارتی دێ بزاڤێ بۆ دەستڤەئینانا پلێتا دەربازبوون بۆ كۆپا ئاسیا 2025 كەن و بڕیارە هەڤڕكیێن وێ ل وەلاتێ سعۆدیێ بهێنە كرن، یارییا ئەڤرۆ هەلبژارتیێ ئیراقێ دێ بیتە مێڤانا هەلبژارتیێ تایۆان د یارییا ئێكێ یا ڤاڤارتنان دا.
