دلژار عه‌دنان: ڕاوه‌ستیانا خولێ بارگرانییه لێ پلان بۆ هاتیه دانان
عەلی حاجی:
د داخویانیەکێ دا ئەندامەکێ دەستەیا کارگێریا یانەیا زاخۆ بۆ رۆژنامەیا ئەڤرۆ ڕاگەهاند ڕاوەستیانا خولێ دێ وان نەچار کەت بتنێ ڕاهێنانان بکەن و هەکە تیمێن بەغدا هەبن دێ یاریێن هەڤالینی ژی ئەنجامدەن.
زێدەتر دلژار عەدنان گۆت: ڕاوەستیانا خولا پێشەکارێن ئیراقێ یا باسکێت بۆلێ بۆ دەما ٤٠ رۆژان بارێ مە گرانتر لێکر ژبەرکو تیما مە هەمی د ناڤ کەش و هەوایێ خولێ دا بوون و شیابوون هەماهەنگیەکا باش دناڤبەرا خوە دا پەیدا بکەن و پشتی هاتنا یاریزانێ مە یێ وەرزێ بوری ئایزاکی ئاستێ مە ژی باشتر لێهات بوو،لێ ڕاوەستیانا خولێ دێ کارتێکرنا خوە هەبیت و ڕەنگە یاریزان ژی ژ کەش و سه‌قایێ یاریان دوور بکەڤین، ئەم دێ هەولدەین ل دووڤ بەرنامەیەکێ ڕێک و پێک یەکەیێن ڕاهێنانێ بەردەوام ئەنجام بدەین و هەکە یانەیێن بەغدا قەستا هەرێما کوردستانێ بکەن ژی دێ یاریێن هەڤالینی ئەنجام دەین ژبەر کو ل کوردستانێ تیمێن ل ئاست نینن و مە پێدڤی ب هندێ هەیە یاریێن هەڤالینی یێن باش ئەنجام بدەین، ئەم ژبیر نەکەین ژی مە خولا نایابا کوردستانێ هەیە و ڕەنگە ئەو ڕێیەکا باش بیت کو هەناسەیا یاریزانێن مە بۆ خولا ئیراقێ بهێلیت.
ناڤبری گۆت ژی: دێ بەردەوام ژی یەکەیێن ڕاهێنانێ کەین پێخەمەتی هندێ بشێن هەماهەنگیەکا زێدەتر دناڤبەرا یاریزانان دا پەیدا بکەین و مە باوەرییەکا تمام ب تیما خوە هەیە کو دێ شێت ئاست و ئەنجامەکێ باش ب دەست خوە ڤە بینن.
