كارتێكرنا نه‌خۆشیێن غودێ ل سه‌ر ژنێن دوگیان
هنده‌ك ژنان پێدڤیه گه‌له‌ك ئاگه‌ه ژ خۆ هه‌بیت، ب تایبه‌ت ئه‌و ژنێن به‌ری دوگیانبوونێ غوده هه‌بیت، دیسان ئه‌و ژنێن كو دایك یان بابێ وان ئه‌ڤ ئێشه هه‌بیت، یان ئه‌وێن نه‌خۆشێن به‌رگریێ هه‌بن، ئه‌و ژن به‌ری بڕیارا دوگیانبوونێ بده‌ن، پێدڤیه شیره‌تا ژ نۆشداره‌كی وه‌ربگرن.
د.دالیا دانا فایق، تایبه‌تمه‌ندا نه‌خۆشیێن دل و هناڤا و شه‌كرێ و غودێ دیاركر كو غوده گه‌له‌ك یا گرنگه بۆ مرۆڤی و كارتێكرنێ ل سه‌ر هه‌موو ئه‌ندامێن له‌شی دكه‌ت و ب تایبه‌ت ل ده‌مێ دوگیانیێ گه‌له‌ك یا گرنگه، چونكو كارتێكرنێ دكه‌ته ل سه‌ر گه‌شه‌كرنا ژنێ و زارۆكی و گۆت: ده‌رباره‌ی جورێن غودێ، غودا ته‌مبه‌ل یان یا كسلان هه‌یه و جوره‌كێ دی به‌رۆڤاژی وی یه كو زێده‌تر كاردكه‌ت و هنده‌ك جارا ره‌نگه ژنا دوگیان گرێیه‌ك ل ناڤ غودێ هه‌بیت یان پشتی دوگیانیێ وه‌ك هه‌ودانه‌كا به‌روه‌خت تووشی غودێ ببیت.
ده‌رباره‌ی نیشانێن غودێ د.دالیایێ دیاركر، ده‌رباره‌ی غودا ته‌مبه‌ل سه‌نگێ نه‌خۆشێ زێده‌دبیت و پیستێ وێ هشكدبیت و قه‌بزبوون بۆ په‌یدادبیت و ده‌رباره‌یغودا زێده شوول دكه‌ت، ژ نیشانێن وێ دلقوتان په‌یدادبیت و ته‌حه‌ملا گه‌رمێ و سه‌رمایێ ناكه‌ت و گه‌له‌ك خوهدان بۆ په‌یدادبیت.
دیاركر ژی ده‌رباره‌ی ژنا دوگیان د ده‌مێ دوگیانیێ دا گه‌له‌ك سه‌ربارك بۆ په‌یدادبن و ره‌نگه فشارا وێ بلند ببیت و ژه‌هراویبوونا دوگیانیێ بۆ په‌یداببیت، ده‌رباره‌ی زارۆكی ژی به‌ری ده‌مێ خۆ ژدایك دبیت یان سه‌نگێ وی كێم دبیت و پاش كارتێكرن ل وه‌رار و مه‌زنبوونا وی دبیت.
هه‌روه‌سا دیاركر كو هنده‌ك ژنان پێدڤیه گه‌له‌ك ئاگه‌ه ژ خۆ هه‌بیت، ب تایبه‌ت ئه‌و ژنێن به‌ری دوگیانبوونێ غوده هه‌بیت، دیسان ئه‌و ژنێن كو دایك یان بابێ وان ئه‌ڤ ئێشه هه‌بیت و دیسا ئه‌وێن نه‌خۆشێن به‌رگریێ هه‌بن، ئه‌و ژن به‌ری بڕیارا دوگیانبوونێ بده‌ن، پێدڤیه شیره‌تا ژ نۆشداره‌كی وه‌ربگرن.
ده‌رباره‌ی چاره‌سه‌ریێ ژی دیاركر كو گرنگترین خال ئه‌وه پشتگوه نه‌هاڤێت و به‌رده‌وام متابعا خۆ بكه‌ت و حه‌بێن خۆ بخۆت و زوی زوی پشكنینان خۆ ئه‌نجام بده‌ن.
