ژبەرهەڤژینا خوە بوویە وێنەگر
دلڤین رەشید:
وێنەگر(حەسەن عەبدولرەحمان) د دیدارەكێ دا بۆ رۆناما ئەڤرۆ دیاكر كو ئەو خەلكێ قەزا بەردەرەشە، ئەڤە بۆ ماوێ چارسالانە ل ئاژانسا خانی دەست ب كارێ وێنەگریێ كریە، ئەو ژی ژبەرهەڤژینا خوە بوویە وێنەگ، داكو خەون و ئارمانجێن وێ نەبنە قوربانیا جڤاكەكی عەشائیری، چنكو ل دەڤەرا وان شەرمە ژن وەك پەیامنێرەك مەیدانی كار بكەت.
ناڤهاتی گۆت: راستە ل دەستپێكێ من چ ژ كارێ كامیری نەدزانی، بەلێ هێدی هێدی من خوە فێركر، ژبۆ هندی ببمە پشتەڤانەكێ ب هێز بۆ هەڤژینا خوە، ئەڤ چەندە ژی هەتا رادەیەكی ل گەل دابو نەریتێن دەڤەرا مە دگونجیان و نوكە گەلەگ خۆشحالم كو ب رێیا چاڤكێ كامیرا خوە بشێم خزمەتا خەلكێ مە بكەم، ئەو ژی دا ببمە هاریكار هەتا كو هەڤژینا من یا بەردەوام بیت ل سەر كارێ خوە یێ راگەهاندنێ، من بڕیاردا ببەمە كامیرەڤانێ وێ و مل ب ملێ وێ ڤە كار بكەم و ئەم هەردو پێكڤە خزمەتا مللەتێ خوە بكەین و هندی دشیانێن من دا بیت ل سەر وان دیمەنان كاربكەم كو دەروونێ خەلكەكی ئارام بكەت، وەلات و سروشتی ب شێوازەكی سەرەنجراكێش نیشا بدەم و هیڤیدارم ژ هەر مالباتەكێ پشتەڤانێ ژنان بن دكارێن وێ دا، چنكو ژنا كورد خودان هێز و ئیرادەیەكا مەزنە، وێ ژی وەكی زەلامان ئارمانج دژیانێ دا هەنە.
