نە ترسن ڕیكۆردا هەوە ناشكێنم
قەیس وەیس:
یاریزانێ هێلا بەرەڤانیێ و كاپتنێ یانەیا زاخۆ ئەحمەد ئیبراهیم ب دووماهی ئینانا كاروانێ خوە دگەل هەلبژارتیێ نێشتیمانی یێ ئیراقێ یێ فوتبۆلێ ڕاگەهاند، پشتی چەند دەمژمێران ژ ڕاگەهاندنا لیستا دووماهیێ یا هەلبژارتیێ ئیراقێ بۆ هەردو یاریێن بهێت ژ ڤاڤارتێن كێشوەرێ ئاسیا بۆ كۆپا جیهانی مۆندیالا 2026ێ بەرانبەر هەر ئێك ژ هەلبژارتیێ ئوردن و عومان.
ئەحمەد ئیبراهیم دیار كر ئێدی ئەوی كاروانێ خوە دگەل هەلبژارتیێ ئیراقێ ب دووماهی ئینا و گۆت: نە ترسن ئەز ڕیكوردا هەوە ناشكێنم، ئەڤ گۆتە هات وەكو نەرازیبوونەك ل سەر نەبوونا ناڤێ وی دناڤ لیستا هەلبژارتیێ ئیراقێ دا و دەربڕین ژ نە رازیبوونێ كرییە.
ل دووڤ ژێدەرێن رۆژنامەڤانی كو ئەڤ هەلوەستە و ب دووماهی هاتنا كاروانێ خوە ئەحمەد ئیبراهیمی بەرسڤا ئەوێ بۆچوونێ دایە كو ژ ترسا هندێ دێ ریكۆردا هندەك یاریزانان بشكێنت، ژ وانا یونس مەحمود جێگرێ دویێ یێ فدراسیۆنا ئیراقێ و ستێرێ بەرێ یێ هەلبژارتیێ ئیراقێ ئەوا 148 یاری ئەنجامداینە، حسێن سەعید 137 یاری هەنە، عەلا عەبدولزەهرە 128 یاری، ئەحمەد رازی 119 و ئەحمەد ئیبراهیم 118 یاری ئەنجامداینە.
